Jemi të vetëdishëm investimet e mëdha prodhuese dhe eksportuese gjatë viteve të fundit kanë qenë të pakëta. Shqipëria përballet me sfidën e tërheqjes së këtyre investimeve, ndërsa një sfidë tjetër duket në horizont. Është ajo e mbajtjes së investimeve të realizuara tashmë. Në bujqësi këto investime janë edhe më të pakëta. E tillë është Doni Fruits, e cila së fundi ka qënë objekti diskutimesh. Doni Fruit, për kompaninë dhe sipërmarrësin e të cilit kemi shkruar më parë, jo vetëm eksporton në dhjetëra vende të botës prodhimet e Shqipërisë. Ajo ka arritur të ngrejë një rrjet prodhuesish, duke nxitur fermerë e prodhues të tjerë të punojnë më shumë dhe me standardet e kërkuara nga tregu ndërkombëtar.
Berat Rukiqi, Kryetari i Odës Ekonomike të Kosovës, i ka kërkuar kryeministrit të Shqipërisë, Edi Rama të ndërmarrë veprime ndaj deputetit Erion Braçe, pasi sipas tij Braçe po përdor gjuhë shantazhuese ndaj kompanisë Doni Fruits. Rukiqi vlerëson kompaninë për suksesin e shënuar në Kosovë e më gjerë.
Gjithçka nisi me qëndrimin e sipërmarrësit Ejup Ahmeti në mbështetje të protestës së fermerëve. Në fundjavë, Ahmeti publikoi në mediat sociale qëndrimin e tij, duke u bërë thirrje fermerëve.
“Të bashkohemi të gjithë së bashku dhe të kërkojmë që në miratimin e Paketës Fiskale të merren në konsideratë gjashtë kërkesat e dërguara nga Shoqata e Eksportuesve të Fruta Perimeve, Këshilli i Agrobiznesit Shqiptarë dhe Sindikata e Fermerëve të Bashkuar. Duhet të kuptojmë që pjesëmarrja në këtë protestë është shumë e rëndësishme për grupet e interesit, të protestosh në mënyrë paqësore për të drejtat e tua, për të drejtat tona të përbashkëta”, tha ai.
Pas këtij postimi, z. Erion Braçe, deputet i Partisë Socialiste, reagoi duke theksuar se, pika e eksporteve Doni Friuts, është ndërtuar nga qeveria dhe kompania është përfituesi më i madh i tatimeve për bujkun.
“Ejupi ka pikën më të madhe të eksporteve në Lushnje, ia bëri Qeveria – kjo Qeveri (afër 100 milionë lekë të reja, plus rrugën nga FSHZH, plus linjë të dedikuar për energjinë nga OSHEE, plus linjë të dedikuar uji nga UK Lushnje); Ejupi është një nga përfituesit më të mëdhenj nga TVSH për bujkun (sipas shifrave nga tatimet); dhe Ejupi është një nga përfituesit më të mëdhenj nga çmimet dhe trajektorja e tyre (sipas shifrave nga doganat)”, ka reaguar Braçe.
Duke e cilësuar këtë si një shantazh ndaj kompanisë, Rukiqi, i bëri apel edhe Qeverisë së Republikës së Kosovës, të adresojë këtë çështje te autoritetet relevante në Shqipëri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
