Konsumatorët amerikanë humbën rreth 2.1 miliardë dollarë nga mashtrimet në rrjetet sociale gjatë vitit 2025, sipas një raporti të ri të Federal Trade Commission (FTC). Sipas këtij institucioni, humbjet nga këto mashtrime janë rritur tetë herë në vitet e fundit dhe tashmë rrjetet sociale janë kthyer në kanalin kryesor përmes të cilit mashtruesit arrijnë të dëmtojnë financiarisht konsumatorët, duke tejkaluar çdo formë tjetër kontakti.
Gati 30% e personave që raportuan humbje financiare nga mashtrimet deklaruan se skemat kishin nisur pikërisht në rrjetet sociale. Platforma Facebook rezulton të jetë më e përmendura në këto raste, ndërsa WhatsApp dhe Instagram renditen më pas, por me një diferencë të konsiderueshme. Në fakt, vetëm nga mashtrimet që kanë origjinën në Facebook, konsumatorët raportojnë humbje më të mëdha sesa nga mashtrimet përmes mesazheve apo email-it.
Të dhënat e FTC tregojnë se mashtrimet në rrjetet sociale marrin forma të ndryshme, por më të përhapurat janë mashtrimet me blerje online. Mbi 40% e personave që humbën para thanë se kishin porositur produkte që i kishin parë në reklama, duke përfshirë veshje, produkte kozmetike, pjesë makinash apo edhe kafshë shtëpiake. Shumë nga këto reklama i drejtonin përdoruesit drejt faqeve të panjohura, ndërsa të tjera imitonin marka të njohura duke ofruar zbritje të mëdha, por në realitet ishin faqe të rreme.
Lexo edhe: Lidershipi i brezit të ri, mësimet e Satya Nadella për CEO-t e së ardhmes
Një tjetër kategori e përhapur janë skemat e investimeve, të cilat shpesh fillojnë me reklama ose postime që premtojnë të mësojnë njerëzit si të investojnë. Në raste të tjera, mashtruesit paraqiten si këshilltarë të besueshëm ose krijojnë grupe në WhatsApp me dëshmi të rreme për të fituar besimin e viktimave. Këto lloj mashtrimesh kanë shkaktuar humbje që arrijnë në rreth 1.1 miliardë dollarë.
Ndërkohë, edhe mashtrimet romantike vijojnë të jenë shqetësuese. Pothuajse 60% e personave që raportuan humbje nga këto skema në vitin 2025 thanë se gjithçka kishte nisur në një platformë sociale. Mashtruesit shpesh përshtatin qasjen e tyre bazuar në profilin e viktimës, krijojnë lidhje emocionale dhe më pas shpikin situata emergjente për të kërkuar para. Në disa raste, ata kalojnë gradualisht edhe në ofrimin e “këshillave” për investime, duke i drejtuar viktimat drejt platformave të rreme.
FTC këshillon përdoruesit të tregohen të kujdesshëm duke kufizuar aksesin në informacionin personal në rrjetet sociale, duke mos u besuar personave të panjohur për vendime financiare apo investime, si dhe duke verifikuar me kujdes çdo produkt apo kompani përpara se të kryejnë një blerje, përfshirë kërkimin e emrit të tyre të shoqëruar me terma si “mashtrim” apo “ankesë”.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
