Biznesmeni dhe aktivisti i njohur shqiptaro-amerikan, Sal Rusi, është takuar me Presidentin e Shteteve të Bashkuara Donald Trump, gjatë një mbrëmjeje në kompleksin e famshëm Mar-a-Lago, në Florida.
Ka qenë një takim mbështetësish republikanë të Presidentit që janë mbledhur në banesën e tij të preferuar jashtë Shtëpisë së Bardhë, ku është takuar shpesh edhe me udhëheqës të vendeve të huaja që kanë vizituar SHBA-në.
Gjatë takimit, Sal Rusi ka bërë edhe një fotografi me çiftin presidencial, Donald e Melania Trump.
Sal Rusi është një nga biznesmenët më të fuqishëm shqiptaro-amerikanë i shquar më shumë në industrinë e ndërtimit, po edhe në fusha të tjera të investimeve.
Ai dhe familja e tij shquhen për vepra filantropike, për ndihma në kauza të njohura ndërkombëtare dhe në lobimin e çështjes shqiptare gjatë tre dekadave të fundit.
Ndonëse erdhën në këtë vend si mërgimtarë, ata janë një nga historitë më të mëdha të suksesit shqiptaro-amerikan në SHBA.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
