Pasuria e sipërmarrësit shqiptar Samir Mane ka shënuar një rritje të ndjeshme gjatë vitit të fundit, duke konsoliduar më tej pozicionin e tij në renditjen globale të miliarderëve të publikuar nga revista Forbes. Sipas përditësimit më të fundit të kësaj reviste prestigjioze, pasuria neto e themeluesit të BALFIN Group vlerësohet tashmë rreth 1.9 miliardë dollarë, një rritje prej afërsisht 500 milionë dollarësh krahasuar me një vit më parë.
Ky zhvillim konfirmon një trend të qëndrueshëm zgjerimi për perandorinë e investimeve të ngritur nga Mane ndër vite. Ai u bë pjesë e listës së miliarderëve të Forbes për herë të parë në vitin 2025, duke hyrë në histori si biznesmeni i parë shqiptar që arrin këtë nivel të pasurisë dhe njëkohësisht i pari nga rajoni i Ballkanit që përfshihet në këtë klasifikim global, duke u renditur i 2177-ti në listën aktuale.
Sipas Ekofin, të dhënat më të fundit tregojnë se pasuria e tij ka vijuar të rritet falë zhvillimit dhe diversifikimit të aktiviteteve të BALFIN Group, një prej konglomerateve më të mëdha të investimeve në Europën Juglindore. Aktualisht Mane mbetet i vetmi përfaqësues nga Ballkani në listën globale të miliarderëve të Forbes.
Sipas Forbes, Mane është themelues dhe president i BALFIN Group, një grup investimesh me qendër në Tiranë që operon në disa sektorë të rëndësishëm të ekonomisë, duke përfshirë tregtinë me pakicë, pasuritë e paluajtshme, logjistikën dhe shërbimet financiare. Në portofolin e tij përfshihen disa nga qendrat tregtare më të mëdha në Ballkanin Perëndimor, rrjete të njohura të shitjes së pajisjeve elektronike, si dhe projekte të rëndësishme rezidenciale dhe turistike në Shqipëri dhe rajon.
Lexo edhe:Samir Mane, shqiptari i parë në listën e miliarderëve të Forbes
Sot BALFIN Group operon me një portofol të gjerë aktivitetesh që shtrihen përtej Shqipërisë. Përveç investimeve në retail dhe pasuri të paluajtshme në Ballkanin Perëndimor, grupi zotëron banka, parqe logjistike dhe projekte të mëdha zhvillimi urban. Sipas Forbes, investimet e tij përfshijnë gjithashtu projekte në Shtetet e Bashkuara, Kanada dhe Austri, si dhe iniciativa infrastrukturore dhe arsimore në Shqipëri.
Për ekonominë shqiptare, prania e një sipërmarrësi vendas në listën globale të miliarderëve të Forbes përfaqëson një moment simbolik: një tregues të konsolidimit të kapitalit privat dhe të maturimit të një brezi biznesesh që tashmë operojnë në shkallë rajonale dhe ndërkombëtare.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
