Google gjobitet 4.3 miliardë euro nga BE. Shkeli rregullat e konkurencës

Komisioni Europian ka gjobitur kompaninë Google me 4.34 miliardë euro, për shkelje të rregullave të konkurrencës në BE.

Sipas njoftimit zyrtar të Komisionit Europian, që nga viti 2011, Google ka bërë kufizime të paligjshme ndaj prodhuesve të pajisjes Android dhe operatorëve të rrjeteve mobile për të vendosur pozitën e saj dominuese në kërkimin e përgjithshëm të internetit. Kompanisë i është dhënë kohë 90 ditë të ndryshojë mënyrën si vendos motorët e kërkimit dhe apps në njësitë e telefonisë Android.

Lajmi vjen ndërsa vetë kompania ka lançuar një prej arritjeve të saj më të mëdha, atë të kalimit të kabllit përgjatë Oqeanit Atlantik.

Lexo: Google hedh hapin e radhës, vendos një kabllo privat në Oqeanin Atlantik

Gjoba e shpallur nga Komisioni Europian vjen pas hetimit të zhvilluar nga BE në kontratat që Google ka bërë me prodhuesit e telefonëve dhe operatorët telefonikë.

Kjo është një vlerë gati dy herë më e lartë se gjoba e vendosur në shtator të vitit të kaluar po nga BE, kompanisë me motorin më të madh të kërkimit në botë.

Atëherë Google u  gjobit 2.4 miliardë euro, për shërbimin e saj të kërkimit të blerjeve.

Por, një faturë akoma më e lartë për Goolge, mund të jetë detyrimi i saj për të hequr nga aparatet Android, aplikacionet e instaluara përmes saj deri tani, për t’u dhënë mundësi prodhuesve të instalojnë aplikacione jo vetëm nga Google por edhe motorë të tjerë kërkimi. Kjo do të lironte jashtëzakonisht shumë terren për zhvilluesit e aplikacioneve, duke qenë se 80% e smartphone-ëve përdorin Android.

BE ka pasur nën kontroll edhe pagesat e Google ndaj operatorëve të telefonisë celulare dhe prodhuesve të telefonave që instalojnë ekskluzivisht vetëm aplikacionet e Google në pajisjet e tyre.

Google zë rreth 90% të tregut të kërkimeve në internet, sistemeve të licencuara të operimit dhe dyqaneve të aplikacioneve për Android.