Jo thjesht “djali/vajza i/e…”, liderët e rinj që po çojnë përpara trashëgiminë e biznesit familjar

Nga Adelina Onuzi- Të rritesh me një mbiemër që peshon nuk është thjesht privilegj, por një përgjegjësi e jashtëzakonshme. Është ndjesia se çdo hap i yti matet me sakrificat e dikujt tjetër, se çdo vendim që merr prek jo vetëm të ardhmen tënde, por edhe historinë e një familjeje, të një komuniteti, të qindra njerëzve që varen nga ajo trashëgimi. Brezi i dytë i liderëve shqiptarë po jeton pikërisht këtë realitet: mes respektit për themelet e ngritura me mund dhe guximit për të ndërtuar një kapitull të ri.

Luis Ndreka në Lushnje, Alba Ruço në zemër të Tiranës, Kostandin Tarusha në Korçë dhe Drini Zusi në sfidën e transformimit të kulturës së kompanisë, nuk janë thjesht “fëmijët e…”. Ata janë brezi që ka zgjedhur të mos fshihet pas emrit, por ta forcojë atë me vizion, inovacion dhe përgjegjësi. 

Trashëgimia për ta nuk është një kornizë që kufizon, por një bazë që kërkon guxim për të ecur përpara. Dhe në këtë ekuilibër mes traditës dhe së ardhmes, po formësohet një brez që e kupton se emri trashëgohet, por respekti fitohet çdo ditë.

“Kam kuptuar se ky biznes është një përgjegjësi e madhe kur kam parë se sa shumë njerëz kanë jetën e tyre të lidhur drejtpërdrejt dhe jo drejtpërdrejt me të. Qindra fermerë, punonjës të kompanisë, furnitorë , të gjithë varen nga suksesi i Lufrës,” rrëfen Luis Ndreka, drejtor i përgjithsëm i LUFRA. “Fabrika jonë në Lushnje është një arsye e rëndësishme për të mbajtur njerëzit në zonë, duke i inkurajuar të punojnë fermat e tyre dhe punonjësit të jetojnë aty. Kjo më ka bërë të kuptoj rëndësinë e rolit tim dhe përgjegjësinë që kam për të siguruar që biznesi të vazhdojë të rritet dhe të jetë i qëndrueshëm.”