Flora Xhemani Baba mbi agroturizmin dhe fuqinë e turistit vendas

Flora Xhemani Baba, gazetare dhe konsulente udhëtimesh me më shumë se 20 vite eksperiencë në fushën e turizmit, na jep një pasqyrë të thelluar mbi pritshmëritë për sezonin turistik 2026. Nga plazhet e bregdetit shqiptar te agroturizmi në zonat rurale, ajo analizon sfidat reale të industrisë, rëndësinë e turistit vendas dhe mënyrën se si autenticiteti i produkteve lokale mund të bëhet një strategji konkurruese. Në një kohë kur turistët nuk kalojnë më javë të tëra në një destinacion, por zgjedhin fundjavë të shkurtra dhe përvoja të ndryshme, menaxhimi i ofertës turistike dhe përmirësimi i infrastrukturës bëhen më të domosdoshme se kurrë. Baba thekson se suksesin e agroturizmit nuk e bën vetëm mikpritja, por lidhja reale me tokën, prodhimet vendase dhe përvojën autentike të pushuesit.

Prej 20 vitesh e më shumë në gazetari dhe turizëm, si e shihni panoramën e turizmit për 2026-ën?

20 vitet e mia të përvojës në turizëm nuk janë të njëjtat; ka pasur një ndryshim gradual në sektor, por nuk mendoj se ky sezon do të ndryshojë ndjeshëm nga 2025-a. Ndryshime mund të shihen ndoshta në perceptimin e përgjithshëm të pushuesve përsa i përket infrastrukturës publike. Pjesa më e rëndësishme, duke marrë parasysh edhe ndryshimet që po bën qeveria për përdorimin e plazheve publike dhe përmirësimin e infrastrukturës bregdetare, mendoj se do të sjellë ndikime pozitive, megjithëse jam skeptike për zbatueshmërinë e këtij ligji.

Në këtë kontekst, respektimi i çmimeve tavan më duket një utopi, e vështirë për t’u realizuar. Nga ana tjetër, bërja e plazheve publike me pagesë duhet të sqarohet mirë. Pushuesi ka të drejtë të pushojë pa pagesë, por nëse merr shërbime nga njësia e bashkisë, pushteti lokal duhet të paguajë për to. Por nëse thjesht dëshiron të vendosë peshqirin ose çadrën e tij në segmentin e quajtur plazh publik, kjo duhet të jetë absolutisht pa pagesë.