Në vitin 1986, një studio dizajni e Toyota në SHBA ndërtoi një kopje të një dhome tipike ngrënieje amerikane dhe e transportoi në Japoni. Aty u ftuan drejtuesit e kompanisë për ta parë dhe për të kaluar pak kohë në atë ambient. Në pamje të parë, arsyeja dukej e thjeshtë: t’u tregohej drejtuesve japonezë se amerikanët janë fizikisht më të mëdhenj dhe kanë nevoja të ndryshme për hapësirë. Por në të vërtetë, qëllimi ishte shumë më i thellë.
Në atë kohë Toyota ishte ende pas konkurrentëve amerikanë si General Motors dhe Ford Motor Company. Kompania kishte ambicie të mëdha për të fituar më shumë terren në tregun amerikan, por për ta bërë këtë duhej të kuptonte më mirë konsumatorin amerikan. Prandaj, studioja e dizajnit Calty Design Research krijoi një dhomë ngrënieje tipike amerikane: një tavolinë e madhe me gjashtë karrige, dritare, perde, mbajtëse qirinjsh dhe një llambadar. Kur drejtuesit japonezë hynë në atë dhomë, ata nuk po mësonin vetëm për madhësinë e mobilieve, por për stilin e jetesës dhe kulturën e amerikanëve.
Çfarë mësimi kishte pas kësaj ideje?
Amerikanët janë mësuar me më shumë hapësirë dhe komoditet në jetën e përditshme. Edhe kur hanë me familjen, tavolina është më e madhe dhe karriget më të largëta nga njëra-tjetra. Kjo lidhet edhe me kulturën amerikane, e cila historikisht vlerëson individualizmin dhe pavarësinë. Në Japoni, përkundrazi, hapësira është më e kufizuar dhe tradita është të hahet në tavolina më të vogla, shpesh në kotatsu (tavolinë e ulët me ngrohje), ku njerëzit ulen më afër njëri-tjetrit. Kjo reflekton një kulturë që vlerëson më shumë bashkëpunimin dhe vendimmarrjen kolektive.
Eksperimenti i Toyotës nuk kishte të bënte vetëm me mobiliet. Ai kishte të bënte me të kuptuarit e mënyrës se si jetojnë dhe mendojnë klientët. Për të pasur sukses në një treg të ri, një kompani duhet të kuptojë jo vetëm produktin që shet, por edhe kulturën, pritshmëritë dhe mënyrën e jetesës së njerëzve që do ta përdorin atë. Fakti që sot makinat Toyota janë kaq të përhapura në rrugët amerikane tregon se kompania e mësoi mirë këtë leksion.
Mesazhi për liderët
Nëse po përpiqeni të hyni në një treg të ri apo të arrini një audiencë tjetër, pyetja kryesore është: A po përpiqeni vërtet të kuptoni klientët tuaj?
Ndonjëherë, mënyra më e mirë për ta bërë këtë është shumë e thjeshtë: vendoseni veten në vendin e tyre, ose, si drejtuesit e Toyota-s atëherë, uluni simbolikisht në tavolinën e tyre.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
