Në një atmosferë të mbushur me energji, frymëzim dhe ide të reja, Konferenca Rajonale e E-Commerce në edicionin e saj të 8-të dëshmoi edhe një herë pse është ngjarja më e shumëpritur për komunitetin digjital në rajon. Më 4 nëntor, Opera dhe Baleti Kombëtar u mbush plot me menaxherë, marketerë, sipërmarrës, përfaqësues organizatash dhe drejtues që u mblodhën për të “përshpejtuar” të ardhmen nën moton “Fasten the Future.”
Me mbi 900 pjesëmarrës nga më shumë se 10 vende dhe 25 folës nga kompani udhëheqëse ndërkombëtare dhe vendore, konferenca e vendosi sërish Shkupin në hartën rajonale si një qendër të rëndësishme për e-commerce dhe transformimin digjital. Me dy skena paralele që krijuan një hapësirë dinamike ku u ndërthurën idetë, teknologjia dhe frymëzimi, eventi i këtij viti shkoi përtej konceptit të një konference tradicionale, duke u shndërruar në një ekosistem të gjallë që bashkoi të dhënat, sjelljen e konsumatorit, lidershipin, marketingun dhe inteligjencën artificiale. Kështu, tregtia elektronike konfirmoi edhe një herë rolin e saj qendror në lidhjen midis bizneseve, konsumatorëve dhe teknologjisë, duke krijuar mundësi dhe standarde të reja.
Lexo edhe: 10 inovacione teknologjike që mund të shpëtojnë Tokën!
Ndër temat kryesore, inteligjenca artificiale (AI) u veçua në mënyrë të posaçme, një realitet që tashmë po ndryshon mënyrën se si bizneset mendojnë, komunikojnë dhe krijojnë vlerë. Përmes prezantimeve kreative dhe diskutimeve të udhëhequra nga ekspertë të kompanive si TikTok, Booking.com, Dolce & Gabbana e të tjera, pjesëmarrësit mësuan se si AI po ndikon në marketing, personalizim, pagesa dhe siguri, si edhe se si inovacioni, kreativiteti dhe teknologjia po formësojnë të ardhmen e e-commerce.
Shoqata e E-Commerce theksoi se konferenca e këtij viti i kaloi të gjitha pritshmëritë dhe konfirmoi se komuniteti po rritet me një ritëm për t’u admiruar. Ata theksuan se tema e AI-t hapi një diskutim të rëndësishëm mbi mënyrën se si teknologjia mund të përmirësojë efikasitetin operacional dhe produktivitetin, duke përshpejtuar kështu rritjen e tregtisë elektronike, si dhe mënyrën se si mund të nxisë besimin, transparencën dhe inovacionin në botën digjitale. Me fjalime frymëzuese, organizim të shkëlqyer dhe pjesëmarrje rekord, konferenca edhe një herë e rikonfirmoi rolin e saj si ngjarja kryesore rajonale që bashkon inovacionin, teknologjinë dhe sipërmarrjen. Ajo dërgoi një mesazh të qartë: inteligjenca artificiale është themeli mbi të cilin po ndërtohet e ardhmja e e-commerce, duke u mundësuar bizneseve të krijojnë zgjidhje më inteligjente, më të përgjegjshme dhe më inovative.
Këtë vit, konferenca u mbështet nga Visa si partner platin, Halkbank si partner strategjik, Korpa si partner ushqimi dhe shpërndarjeje, Brainster si partner AI dhe A1 si partner digjital, ndërsa Ananas dhe Casys ishin partnerë gold. Partnerët silver përfshinin Komercijalna Banka, IUTE, Philip Morris International, Sava Pension Company, Grand Skopje, Public Cloud Group dhe Wolt, së bashku me shumë partnerë të tjerë bronze.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
