Një teknologji e re dhe premtuese ka hyrë në skenë për të trajtuar depresionin dhe nuk përfshin as ilaçe, as seanca të gjata me psikologë. Quhet PRISM dhe është zhvilluar nga kompania amerikane GrayMatters Health, duke ofruar një metodë revolucionare të vetë-rimodelimit të trurit (self-neuromodulation) për të trajtuar simptomat e depresionit dhe PTSD-së.
Si funksionon PRISM?
Trajtimi realizohet përmes një pajisjeje EEG që vendoset në kokën e pacientit dhe mat aktivitetin e zonave të trurit që lidhen me emocionet, stresin dhe ndjesinë e shpërblimit. Në vend që pacientët të flasin për traumën e tyre ose të marrin medikamente, ata mësojnë të “qetësojnë” apo “aktivizojnë” trurin përmes një teknike personale mendore si një kujtim i bukur, një këngë relaksuese apo një mantra.
Seancat zhvillohen në formën e një “loje video”: pacienti sheh në ekran karaktere të animuara që reagojnë në kohë reale ndaj nivelit të qetësisë që arrin të gjenerojë truri i tij. Kur aktiviteti emocional ulet, karakteret ulen dhe qetësohen, një tregues vizual i suksesit të pacientit në vetë-rregullimin emocional.
Lexo edhe: Si mund t’ju bëjë “networking” një menaxher më të mirë?
Versioni i parë i PRISM u testua për trajtimin e PTSD-së (çrregullimi post-traumatik i stresit) dhe rezultoi i suksesshëm: 67% e pacientëve panë përmirësim të ndjeshëm të simptomave dhe cilësisë së gjumit, ndërsa një e treta u futën në remitencë të plotë. Pas këtij suksesi, u zhvillua edhe PRISM për Depresion, i cili synon të riaktivizojë “qendrën e shpërblimit” në tru, zonë që shpesh është e fjetur te pacientët me depresion, duke i lënë ata pa ndjesi kënaqësie (anhedonia). Në këtë version, pacienti përqendrohet në një kujtim të gëzueshëm ndërsa sheh një qen të animuar që përpiqet të marrë vëmendjen e një njeriu. Kur pacienti arrin të mbajë ndjesinë e gëzimit për disa sekonda, personazhi reagon pozitivisht.
Rezultatet dhe përparësitë
Në një studim klinik të kryer me 44 persona me depresion të moderuar, 78% treguan përmirësim të simptomave pas vetëm 10 seancash. Më shumë se 30% arritën në remitencë.
Avantazhet kryesore të kësaj metode përfshijnë:
-
Nuk ka nevojë për medikamente.
-
Nuk kërkohet rikujtimi i traumave.
-
Efekte anësore minimale si lodhje apo marramendje.
-
Përmirësime të ndjeshme në një periudhë të shkurtër kohore.
Një alternativë për mijëra pacientë
Kjo qasje është veçanërisht e dobishme për ata që nuk e përballojnë terapinë ekspozuese ose kanë dështuar me ilaçet tradicionale. Megjithatë, nuk rekomandohet për pacientë në depresion shumë të thellë që nuk mund të dalin nga shtëpia, pasi kërkon pjesëmarrje aktive në seanca të rregullta në klinikë. Ndërkohë që PRISM për PTSD është tashmë në përdorim në mbi 20 klinika në SHBA, versioni për depresion është në pritje të aprovimit nga FDA, por mund të përdoret si pajisje me rrezik të ulët në praktikat psikiatrike.
Një epokë e re në trajtimin e shëndetit mendor?
PRISM përfaqëson një qasje të re, më të qetë dhe më miqësore ndaj pacientit për trajtimin e gjendjeve të rënda emocionale. Ajo nuk zëvendëson terapi apo medikamente kur këto janë të nevojshme, por hap një rrugë tjetër për ata që kërkojnë metoda alternative dhe më të personalizuara për të përballuar dhimbjet emocionale të së kaluarës dhe për të rigjetur gëzimin në të përditshmen.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
