Amazon ka hedhur në hapësirë nga Florida 27 satelitët e parë të rrjetit të saj të internetit nga hapësira, Project Kuiper, duke nisur kështu më në fund ndërtimin e një rrjeti që pritet të konkurrojë drejtpërdrejt me Starlink të SpaceX.
Këta janë të parët nga gjithsej 3,236 satelitët që kompania planifikon të vendosë në orbitën e ulët të Tokës. Project Kuiper, një iniciativë me vlerë 10 miliardë dollarë e shpallur në vitin 2019, synon të ofrojë internet me shpejtësi të lartë për konsumatorët, bizneset dhe institucionet publike në të gjithë globin — një treg që SpaceX ka dominuar prej vitesh me rrjetin e saj Starlink. Satelitët u hodhën në hapësirë në orën 7 të mbrëmjes me kohën lokale nga baza Cape Canaveral Space Force Station, mbi një raketë Atlas V të ndërtuar nga United Launch Alliance — një ndërmarrje e përbashkët mes Boeing dhe Lockheed Martin. Nisja u shty më herët për shkak të kushteve të pafavorshme të motit më 9 prill.
Sfida ndaj Starlink dhe kompanive tradicionale të telekomunikacionit
Kuiper konsiderohet si një nga bastet më të mëdha të Amazon në zhvillim e sipër, duke e vënë kompaninë përballë Starlink dhe operatorëve globalë të telekomunikacionit si AT&T dhe T-Mobile. Amazon ka pozicionuar shërbimin si një shpëtim për zonat rurale ku lidhja me internetin është e kufizuar ose mungon plotësisht. Megjithatë, rruga deri këtu nuk ka qenë e lehtë. Nisja e parë operative u vonua më shumë se një vit — Amazon fillimisht shpresonte që satelitët e parë të lëshoheshin në fillim të vitit 2024. Kompania përballet me një afat të vendosur nga Komisioni Federal i Komunikimeve i SHBA (FCC), që kërkon të vendosë në orbitë gjysmën e konstelacionit, pra 1,618 satelitë, deri në mes të vitit 2026. Për shkak të fillimit të vonuar, analistët parashikojnë se Amazon mund të kërkojë një zgjatje të afatit. Pas hedhjes në hapësirë, Amazon pritet të konfirmojë kontaktin fillestar me të gjithë satelitët nga qendra e saj operative në Redmond, Uashington. Nëse gjithçka shkon sipas planit, kompania ka njoftuar se mund të nisë ofrimin e shërbimit për klientët brenda këtij viti. United Launch Alliance mund të kryejë deri në pesë misione të tjera për Kuiper gjatë këtij viti, konfirmoi CEO i ULA, Tory Bruno. Në një paraqitje në FCC më 2020, Amazon tha se shërbimi mund të nisë në disa zona veriore dhe jugore kur të jenë vendosur 578 satelitë, dhe më pas të zgjerohet gradualisht drejt ekuatorit ndërsa numri i satelitëve rritet.
Lexo edhe:Elon Musk nuk na qenka themeluesi i vërtetë i Tesla!
Amazon hyn seriozisht në garën hapësinore
Project Kuiper është përpjekja më ambicioze e Amazon për të hyrë në hapësirë, megjithëse ka një fillim të vonuar në një treg që dominohet nga SpaceX. Megjithatë, drejtuesit e Amazon besojnë se eksperienca e gjerë e kompanisë në produktet për konsumatorë dhe forca e saj në shërbimet cloud mund t’i japin një avantazh ndaj Starlink. Amazon hodhi në orbitë dy satelitë prototip në 2023, të cilët u testuan me sukses përpara se të çaktivizoheshin në 2024. Përpara këtij momenti, programi ishte mbajtur relativisht i fshehtë deri kur u njoftua nisja e parë operative këtë muaj.
“Ka vend për shumë fitues”
Ndërkohë, SpaceX e Elon Musk vazhdon të avancojë me ritme të shpejta. Kompania ka hedhur mbi 8,000 satelitë Starlink në orbitë që nga viti 2019, duke shënuar nisjen e saj të 250-të të dedikuar për Starlink këtë të hënë. Me një frekuencë prej të paktën një misioni në javë, SpaceX po zgjeron rrjetin e saj dhe po zëvendëson satelitët më të vjetër. Kjo qasje agresive ka ndihmuar Musk të arrijë më shumë se 5 milion përdorues interneti në 125 vende, të ndryshojë tregun global të komunikimeve satelitore dhe të tërheqë agjenci ushtarake dhe të inteligjencës për programe të ndjeshme të sigurisë kombëtare. Jeff Bezos, drejtuesi ekzekutiv i Amazon, është shprehur i bindur se Kuiper mund të konkurrojë me Starlink. “Ka një kërkesë të pangopur për internet,” tha ai për Reuters në janar. “Ka vend për shumë fitues në këtë fushë. Parashikoj që Starlink do të vazhdojë të jetë i suksesshëm, por edhe Kuiper do të ketë sukses,” shtoi ai. “Do të jetë kryesisht një sistem komercial, por padyshim do të ketë edhe përdorime mbrojtëse për këto konstelacione në orbitën e ulët të Tokës.” Në vitin 2023, Amazon prezantoi terminalet e saj për përdoruesit — një antenë me madhësinë e një disku vinyl dhe një version më të vogël, sa një pajisje Kindle. Çmimi pritet të jetë më pak se 400 dollarë për njësi dhe kompania planifikon të prodhojë dhjetëra miliona prej tyre. Në 2022, Amazon siguroi 83 lëshime raketash nga ULA, Arianespace e Francës dhe Blue Origin — kompania hapësinore e Bezos — duke realizuar marrëveshjen më të madhe në industrinë e lëshimeve, në përgatitje për ndërtimin e Kuiper.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English