Zhvillohet në universitetin Polis workshop-i ciklit të dytë të projektit ConnectIT

Me pjesëmarrjen e grupeve studentore dhe prezencën e ekspertëve ndërkombëtarë, edhe në këtë fazë, qëllimi i projektit është zhvillimi i zgjidhjeve teknologjike për biznesin mikro, të vogël e të mesëm.

Arjan Goudsblom nga Preneurz Amsterdam, ekspert ndërkombëtar foli për Business Magazine, duke u shprehur se ndihet i kënaqur që ka ardhur në Shqipëri dhe është pjesë e këtij projekti.

Ai u shpreh se, “Kam punuar për universitetet prej vitesh tashmë dhe është kënaqësi të rikthehem, të mësoj nga komuniteti vendas dhe të punoj më to për të siguruar rezultate me të mira.

Ne kemi bërë disa projekte, disa herë për startupet, ndërsa në këtë rast po punojmë me biznese ekzistuese, të cilat sigurojnë një tjetër nivel të përvojës për studentët. Ne e dimë që është në të mirë të të dy palëve, studentëve dhe biznesit, të cilët mund të fitojmë më shumë aftësi dhe përvojë duke punuar me teknologjinë digjitale.

Siç kam parë edhe nga cikli i parë, shumë prej tyre kanë mangësi në infrastrukturën teknologjike, veçanërisht bizneset e vogla, nuk kanë ekspertizë për të zhvilluar produktet dhe shërbimet e tyre në platforma digjitale, ndaj studentët kanë ndihmuar realisht të sigurojnë zgjidhje për bizneset. Ne e kemi parë tashmë këtë hap të parë, ku bizneset kanë përfshirë disa produkte digjitale në aktivitetet e tyre dhe hapi tjetër do të jetë nisja e përdorimit të tyre dhe ndërveprimit me konsumatorët, për të siguruar rezultate më të mira dhe më shumë shitje”.

Sipas tij, “objektivi afatgjatë i këtij programi është të zgjerohet në një numër më të madh kompanish, që kanë akses në programe të tilla që rrisin rezultatet e këtij projekti. Kjo do të kërkojë pak kohë, por sigurisht përshpejton performancën e bizneseve në Shqipëri në drejtimin digjital. Është e rëndësishëm që kompanitë vendase, universitetet dhe aktorët e tjerë të tregut të përqafojnë këto ndryshime. Mendoj se ketu ka shumë potencial dhe ambicie të lartë për të krijuar vlerë në shoqëri”.

Adelina Merko, studente e universitetit Politeknik i Tiranës.

Si erdhi kjo eksperiencë tek ju dhe si ndiheni që keni hedhur një hap të tillë ?

Ishte një përvojë vërtet unike dhe e bukur për ne dhe shumë e veçantë, pasi për herë të parë duhet të ishim në marrëdhënie me klientin. Fillimisht kuptuam që duhet të kishim një komunikim shumë të mirë me grupin që në fillim, gjë që ndihmoi të kishim një bashkëpunim shumë të mirë në vijim.

Pika tjetër e fortë ka qenë komunikimi me klientin për të qenë sa më të drejtëpërdrejtë me ta për pikat më të forta që ata kanë dhe për t’i suportuar në rrugëtimin e tyre.

Fillimisht kur kemi marrë listen e bizneseve që ishin pjesë e këtij projekti e kemi dashur shumë dhe kur ramë në kontakt me biznesin në qytetin e Korçës , u kënaqem. Ky ishte një biznes që lidhej me pasurinë kombëtare të veshjeve tradicionale dhe lidhej drejtpërdrejtë me promovimin e tyre .

Ne mbajtëm në menaxhim edhe rrjetet sociale dhe jemi të kënaqur nga arritjet tona.

Dr. Elona Karafili, Drejtuese e projektit

Unë jam shumë e kënaqur projekti vijon të ë shumë mirë dhe gjatë ciklit të dytë.

Në ciklin e parë kishim dy universitete, atë të Tiranës dhe Aleksandër Moisiu në Durrës. Kësaj here janë 4: universiteti Polis, ai Politeknik, Metropolitan dhe Epoka.

Krahas faktit që ka më shumë universitete të përfaqësuara, këtë rradhë grupi i studentëve është më i larmishëm dhe në formim. Disa prej tyre studiojnë shkenca kompjuterike, disa informatikë biznesi, inxhinieri kompjuterike, etj;

Gjithashtu ka nje diversitet më të lartë edhe nga bizneset.

Disa prej tyre kanë kërkuar zgjidhje digjitale më komplekse, por kjo i ka nxitur edhe më shumë studentët.

Kështu që, për këto arsye, jam e bindur që projekti do ketë një impakt të qenësishëm dhe tek bizneset, por mbi të gjitha tek studentët dhe formimin e tyre profesional.