Rregullatorët autorizuan të premten përdorimin e vaksinës së kompanisë AstraZeneca për koronavirusin tek të rriturit në të gjithë Bashkimin Evropian. Komisioni i ekspertëve të Agjencisë Evropiane të Barnave rekomandoi njëzëri që vaksina të përdoret tek moshat 18 vjeç e lart, megjithëse këtë javë u ngritën shqetësime se nuk ekzistonin të dhëna të mjaftueshme për të vërtetuar se vaksina funksionon tek të moshuarit dhe disa vende lanë të kuptohet se mund të mos i jepnin ato për të moshuarit.
Vaksina e AstraZenekës është vaksina e tretë e COVID-19 që merr dritën jeshile nga Agjencia Evropiane e Barnave pas atyre nga kompanitë Pfizer dhe Moderna.Vendimi i agjencisë evropiane kërkon miratimin përfundimtar nga Komisioni Evropian, një proces që u krye shpejt me vaksinat e tjera.
Disa orë më vonë, BE-ja dha mbështetjen e saj për përdorimin e vaksinës në të 27 vendet anëtare. “Pres që kompania të dorëzojë 400 milionë doza siç është rënë dakord. Ne do të vazhdojmë të bëjmë gjithçka që mundemi për të siguruar vaksina për evropianët, fqinjët dhe partnerët tanë në të gjithë botën,”shkroi në Twitter presidentja e Komisionit të BE-së, Ursula von der Leyen.
Ndërkohë, vaksina e re Novavax, duket se është 89.3% efektive në parandalimin e Covid-19. Stan Erck, shefi ekzekutiv i Novavax, tha se rezultatet nga studimi në Mbretërinë e Bashkuar ishin “spektakolare” dhe “aq të mira sa mund të shpresonim. Ai ka theksuar se fabrika e prodhimit në Stockton-on-Tees duhet të funksionojë deri në Mars ose Prill, pas miratimit të vaksinës nga ekspertët.
Sa efektive është vaksina e re Novavax kundër koronavirusit origjinal dhe varianteve të reja?
Në një analizë të ndërmjetme të një prove klinike të fazës 3 të kryer në Mbretërinë e Bashkuar, vaksina Novavax është 89% efektive. Në fazën e tretë morën pjesë 4000 njerëz. Kjo provë tregoi se ishte 95.6% efektive kundër koronavirusit origjinal dhe 85.6% efektive kundër variantit të ri Anglez.
A do të funksionojë vaksina e re për variantin e Afrikës së Jugut?
Një provë më pak e saktë e fazës 2 të kryer në Afrikën e Jugut me 4,400 vullnetarë, në të cilën 90% e rasteve ishin shkaktuar nga varianti i ri, nuk tregoi rezultate kaq të forta. Ishte 60% efektive në parandalimin e këtij varianti. Ndërsa tek pjesëmarrësit me HIV pozitivë, ishte 49% efektiv. Novavax shpjegoi gjithashtu se menjëherë do të fillojë të zhvillohet një vaksinë e re që synon specifikisht variantin e Afrikës së Jugut.
Sa doza do të jenë në dispozicion?
Në varësi të miratimit të rregullatorit të vaksinave dhe medikamenteve si FDA dhe EMA, dozat do të prodhohen në varësi të porosisë në një fabrikë në Teesside e cila pritet të funksionojë në Mars ose Prill. Në dhjetor BE përfundoi bisedimet mbi një kontratë e cila do të mbulonte 100 milion doza në fillim me 100 milion doza të tjera për t’u ndjekur, por ajo marrëveshje nuk është nënshkruar ende.
Shtetet e Bashkuara i dhanë Novavax 1.6 miliard dollarë si pjesë e programit të tyre “Warp Speed” në korrik me synimin për të siguruar 100 milion doza deri në janar ose shkurt.
Sa lehtë mund të merret vaksina?
Vaksina Novavax ka një avantazh për sa i përket shpërndarjes mbi vaksinat ekzistuese Pfizer / BioNTech dhe Moderna sepse, ashtu si vaksina e AstraZeneca, mund të mbahet në një frigorifer normal. Kjo e bën dukshëm më të lehtë shpërndarjen.
Si krahasohet shkenca që qëndron pas saj me vaksinat ekzistuese më të spikatura?
Vaksina Novavax është e ndryshme nga vaksinat Oxford / AstraZeneca ose Pfizer / BioNTech. Ajo përmban proteina spike, të prodhuara nga qelizat e molës të infektuara me një virus të modifikuar gjenetikisht, së bashku me një substancë të quajtur një ndihmëse që rrit përgjigjen imune.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
