Kalatë e lashta dhe rrugicat me kalldrëm të qytetit historik të Dubrovnikut, që për shumë vite shërbyen si skena ikonike për serialin “Game of Thrones” dhe filmin “Star Wars: The Last Jedi”, janë sot përballë një kërcënimi të papritur, një tarifë 100% për filmat e prodhuar jashtë SHBA-ve, e paralajmëruar këtë muaj nga presidenti Donald Trump.
Ky paralajmërim ka ngritur alarmin te industria e filmit dhe banorët vendas, të cilët i druhen faktit se produksionet ndërkombëtare mund të shmangin tashmë Kroacinë si destinacion xhirimesh.
“Ka pasur shqetësime të mëdha për shkak të tarifave që Trump synon të vendosë,” deklaroi producenti kroat Igor Aleksandar Nola, duke shtuar se buxhetet e produksioneve tashmë janë goditur nga paqëndrueshmëria ekonomike globale. “Financimet nga bankat dhe fondet investuese për prodhime audio-vizuale janë pezulluar për shkak të pasigurisë.”
Lexo edhe: TV tradicional kundër gjigantëve të botës digjitale: Kush do të fitojë?
Për vite me radhë, vendet e Evropës Qendrore dhe Ballkanit janë përdorur nga Hollywood-i për peizazhet dramatike, stilin arkitekturor të larmishëm dhe kostot më të ulëta të prodhimit. Sapo një film apo serial arrin sukses, lokacionet e tij kthehen në pika tërheqëse për turistët.
“Filmat dhe veçanërisht Game of Thrones e kanë ndryshuar tërësisht Dubrovnikun,” tha udhërrëfyesi turistik Ivan Vukovic. Sipas tij, rreth 1,000 turistë në ditë marrin pjesë në turin tematik të Game of Thrones.
Rritja e turizmit solli me vete hapjen e dyqaneve suveniresh, krijimin e vendeve të reja pune për guida turistike dhe për banorë që ndihmonin në produksion gjatë sezonit të ulët.
“E gjithë kjo solli një bum ekonomik të jashtëzakonshëm,” shtoi Vukovic.
Megjithatë, ende mungojnë detaje konkrete nga Trump për kohën apo mënyrën e zbatimit të tarifave, duke lënë industrinë në pasiguri.
Pjesëmarrësit në Festivalin e Filmit të Kanës, i cili u hap të martën, po ndjekin një qasje të kujdesshme “si zakonisht”, pas goditjes fillestare nga njoftimi për tarifat.
Ndërkohë, kryetari i Bashkisë së Dubrovnikut, Mate Frankovic, shprehu besimin se kriza nuk do të jetë afatgjatë, dhe se impakti në turizëm apo prodhimet filmike nuk do të jetë i thellë.
“Nuk mund ta imagjinoj asnjë prodhim serioz amerikan që të përjashtojë qytetet kryesore evropiane nga skenat e tij,” u shpreh Frankovic.
Reuters
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
