30 vite nga hapja e kufijve të Shqipërisë, gati 1.7 milionë shqiptarë rezultojnë të gjenden jashtë kufijve të vendits. Sipas Raportit për Diasporën, publikuar nga Instituti Shqiptar i Statistikave, numri i shqiptarëve të larguar për të jetuar jashtë vendit gjatë 1990-2020 arriti në 1.684.135 persona, ku 884.719 janë meshkuj dhe 799.416 janë femra.
Shifrat tregojnë se diaspora është e një moshe relativisht të re. 19% e saj është mes moshës (0-14 vjeç). Moshat 5-64 vjeç përbëjnë rreth 76% dhe 5% e diasporës janë mbi 65 vjeç.
Prirjet e fundit janë për emigracionin drejt Gjermanisë. Sipas INSTAT, në vitin 2015, numri i emigrantëve shqiptarë në Gjermani filloi të rritej me një normë vjetore rreth 35%, duke e kthyer këtë vend si destinacionin kryesor të tyre. Ndaj pesha e emigrantëve drejt Gjermanisë u rrit 4 herë në 5 vitet e fundit, duke kaluar nga 1,3% në vitin 2015 në mbi 4% këtë vit.
Arsyet e emigracionit janë kryesisht: punësimi, arsimimi dhe arsye familjare.
Lexo: Zhvillimin e Shqipërisë, si e mendon një profesionist shqiptar, i lindur dhe rritur në Zvicër
Dy destinacionet kryesore të para, Italia dhe Greqia kanë numrin më të madh të shqiptarëve që jetojnë jashtë vendit. Të dyja zë bashku kanë rreth 75% të emigrantëve. Pas tyre vjen SHBA, Gjermania, Mbretëria e Bashkuar, Kanadaja, Belgjika, etj.
Gjatë viteve 1990, pjesë e migrimit u bënë të rinjtë dhe meshkujt. Pas dhjetë vitesh, pjesë e emigracionit ishin edhe familjarë, studentë që nuk riktheheshin pas përfundimit të studimeve. Së fundi, pjesë e emigracionit janë bërë edhe familje të reja, kryesisht profesionistë.
Në fakt, Censi i gati 10 viteve më parë nxori në pah faktin se ka pasur një humbje neto të popullsisë prej 269 mijë personave në periudhën 2001-2011. Duke përllogaritur imigracionin dhe rritjen e popullsisë, largimi real i shqiptarëve në atë periudhë vlerësohet të jetë rreth 482 mijë shqiptarë.
Vitet e fundit, krahas emigracionit në nivele të larta, ka pasur edhe një ulje theksuar të numrit të lindjeve, duke rritur moshën mesatare të popullsisë në vend.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
