Kur mendoni për Europën Perëndimore, zakonisht fjala “ekonomike” nuk është e para që ju vjen në mendje. Franca, Anglia, Zvicra apo Holanda janë ndër destinacionet më të shtrenjta në botë. Por në këtë mozaik të luksit, ekziston një përjashtim i rrallë që befason…Portugalia!
Në një kohë kur inflacioni dhe shpërnguljet e nomadëve digjitalë po ndryshojnë fytyrën e qyteteve, Portugalia mbetet një ndër zgjedhjet më të zgjuara dhe më të përballueshme në Europë. Nëse Lisbona ju duket tashmë një “bargain”, imagjinoni çfarë mund të zbuloni jashtë kryeqytetit. Ja pesë qytete të mrekullueshme, ende të pazbuluara nga shumica e turistëve, që ju ofrojnë përvoja të paharrueshme pa ju zbrazur portofolin:
Braga – “Roma” e Portugalisë
Një qytet antik që frymon histori në çdo cep. Braga, me katedralen më të vjetër të vendit (Sé de Braga, ndërtuar më 1070) dhe mrekullinë neoklasike të Bom Jesus do Monte, ofron një përzierje magjike mes monumenteve madhështore dhe rrugicave të ngushta plot jetë. Një vakt në restorant kushton mesatarisht vetëm 10 dollarë, ndërsa në “Tasquinha do Fujacal” mund të shijoni gatime tradicionale nga 12 dollarë.
Lexo gjithashtu: Zëri i Vjosës dëgjohet në botë, aktivistët shqiptarë nderohen me ‘Goldman’
Coimbra – “Mini Porto” me shpirt rinor
Në këtë qytet universitar plot gjallëri, ku ndodhet një nga universitetet më të vjetra në Europë (Themeluar në vitin 1290), çdo hap është një udhëtim në kohë. Biblioteka e famshme Joanina, rrugicat me kalldrëm dhe çmimet shumë të përballueshme, ku një supë peshku kushton vetëm 4.5 dollarë, e bëjnë Coimbran destinacionin perfekt për udhëtarët me buxhet të kufizuar.
Évora – Një udhëtim në kohën e romakëve
Në zemër të Alentejos, Évora mburret me një tempull romak të shekullit të parë dhe një katedrale mesjetare mahnitëse. Për vetëm 4 dollarë mund të ngjiteni mbi çatinë e katedrales për një pamje spektakolare mbi qytetin dhe fushat përreth. Mos lini pa provuar specialitetin lokal “porco à alentejana” dhe verërat vendase që kushtojnë rreth 7 dollarë gota.
Aveiro – Venecia portugeze
Një qytet i çuditshëm dhe plot ngjyra, i përshkuar nga kanale ku lundrojnë anije tradicionale të pikturuara, të njohura si moliceiros. Një udhëtim me barkë në Grande Canal kushton një fraksion të çmimit të një gondole në Venecia. Mos harroni të provoni ëmbëlsirën tradicionale ovo mole dhe të shijoni një çaj në ballkonin me pamje nga kanali në Muzeun e Art Nouveau.
Olhão – Sekreti i Algaves që pak e dinë
Në jug të Portugalisë, në zemër të Algarve, fshihet Olhão, një qytet peshkatarësh me arkitekturë të veçantë kubike dhe atmosferë autentike. Pazarët plot peshk të freskët dhe restorantet e vogla pranë detit ofrojnë darka të bollshme me peshk të pjekur dhe patate të ëmbla për rreth 18 dollarë. Një oaz i qetë larg turmave turistike të Albufeiras.
Në një Europë Perëndimore ku çdo cent vlen, Portugalia del si një perlë e vërtetë për ata që kërkojnë kulturë, histori dhe gastronomi pa sakrifikuar xhepin. Nëse po planifikoni udhëtimin tuaj të radhës, këto pesë qytete janë përgjigjja për një eksperiencë autentike dhe ekonomike në zemër të kontinentit të vjetër.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
