U refuzua 10 vite, 6 dhëmbë të humbur, sakrificat për “Squid Game”. Regjisori tregon dhe planet për sezonin e dytë

Seriali “Squid Game” është kthyer në një fenomen botëror. Netflix gëzon të drejtat ekskluzive dhe është shprehur se është seriali më i ndjekur në gjuhë të huaj(jo-anglisht) gjatë gjithë historisë së platformës. Shumë debate janë hapur në lidhje me serialin, i cili në përbërje të tij ka rreth 400 konkurrentë që vdesin gjatë lojërave të ndryshme dhe fituesi i fundit do të fitojë një shumë të majme lekësh.

Regjisori dhe skenaristi i serialit Hwang Dong-hyuk ka dhënë një intervistë për CNN, duke shpjeguar sakrificat që ka kaluar.

Ai është shprehur se skenarin e ka shkruajtur para 10 viteve, por është refuzuar vazhdimisht, me arsyen se seriali nuk ishte fare pranë realitetit.

“Përpara 10 viteve më thonin që ishte një fantazi larg realiteti, ndërsa brenda 10 viteve bota ka ndryshuar aq shumë, sa Squid Game i përshtatet tashmë. Kam njerëz në botën reale që më thonë se nëse loja ekziston vërtet ata do ishin të gatshëm të merrnin pjesë, ndërsa të tjerë mendojën se diku kjo lojë ekziston dhe kanë filluar kërkimet”, thotë ai.

Regjisori është shprehur se gjatë filmimit të serialit ka humbur 6 dhëmbë për shkak të stresit dhe se nuk ka pasur ende mundësi t’i rregullojë. Më tej ai ka folur edhe për personazhet e serialit.

Lexo edhe: Squid Game – Mësimet e jetës që ofron fenomeni botëror

“Personazhet kryesore janë të bazuar në jetën time. Unë jam rritur nga një mama e vetme dhe kisha një gjyshe që shiste perime me tezga, njësoj si fituesi i lojës Squid Game”, tregon Dong-hyuk.

Ai është shprehur edhe në lidhje me vazhdimin e sezonit të dytë:

“Nuk e di nëse do ta bëjmë, ende nuk ka një konfirmim. Nëse merret një vendim besoj se do doja të shtjelloja pak më shumë historinë e organizatorit të lojërave, i quajtur “Front Man”, si dhe historinë e vëllait të tij detektiv, i cili u vra në fund të sezonit të parë. Shpresoj shumë që gjërat të shkojnë sic duhet. ”

Burimi: CNN