Administrata Trump ka njoftuar ngrirjen e mbi 2 miliardë dollarëve fonde federale për Universitetin e Harvard-it, vetëm disa orë pasi ky i fundit refuzoi një listë kërkesash të paraqitura nga Shtëpia e Bardhë. Në një deklaratë për shtyp, Departamenti i Arsimit e kritikoi ashpër vendimin e Harvard-it duke thënë se “deklarata e sotme e këtij universiteti forcon mendësinë problematike të privilegjit, e cila është e përhapur në universitetet më prestigjioze të vendit tonë”.
Lista e kërkesave, e dërguar javën e kaluar, sipas Shtëpisë së Bardhë kishte për qëllim luftimin e antisemitizmit në kampus dhe përfshinte ndryshime të thella në drejtim, praktikat e punësimit dhe procedurat e pranimit në universitet. Harvard e refuzoi zyrtarisht listën të hënën, duke deklaruar se Shtëpia e Bardhë po përpiqej të “kontrollonte” komunitetin e vet akademik. Ky është universiteti i parë i madh amerikan që sfidon hapur presionin e administratës Trump për ndryshim politikash.
Presidenti Donald Trump ka akuzuar universitetet elitare amerikane për dështimin në mbrojtjen e studentëve hebrenj, veçanërisht gjatë protestave kundër luftës në Gaza dhe mbështetjes amerikane për Izraelin vitin e kaluar. Në një letër drejtuar komunitetit të Harvard-it të hënën, Presidenti i këtij institucioni, Alan Garber, bëri të ditur se universiteti kishte marrë një listë të përditësuar dhe të zgjeruar të kërkesave të premten e kaluar, bashkë me një paralajmërim të qartë: universiteti duhet të pajtohej, përndryshe rrezikonte marrëdhënien financiare me qeverinë federale. “Njoftuam administratën përmes këshilltarit tonë ligjor se nuk do ta pranojmë këtë marrëveshje të propozuar,” shkroi Garber. “Universiteti nuk do të dorëzojë pavarësinë e tij dhe nuk do të heqë dorë nga të drejtat kushtetuese.”
Lexo edhe: Universitetet më të mira në botë për vitin 2025
Menjëherë pas publikimit të letrës, Departamenti i Arsimit njoftoi ngrirjen e 2.2 miliardë dollarëve në grante dhe 60 milionë dollarë në kontrata të tjera me Harvard-in.
Në mars, administrata Trump njoftoi se po shqyrtonte 256 milionë dollarë fonde aktuale dhe 8.7 miliardë dollarë grante afatgjata në Harvard. Profesorë të universitetit ngritën padi ndaj qeverisë, duke e akuzuar për shkelje të lirisë së fjalës dhe pavarësisë akademike. Ndërkohë, më herët administrata kishte ndërprerë 400 milionë dollarë fonde federale për Universitetin Columbia, duke e akuzuar se nuk kishte bërë mjaftueshëm për të mbrojtur studentët hebrenj. Columbia u detyrua të pranonte disa nga kërkesat e administratës, duke nxitur kritika nga studentë dhe pedagogë.
Burimi: BBC/ Përshtati: Businessmag.al
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
