Tërmet i fuqishëm në Durrës. Forca emergjence nga disa vende të huaja. Fondi rezervë i buxhetit të shtetit, i dobët

26 Nëntori u zbardh me një tjetër tërmet të fuqishëm me epiqendër në Durrës. Me një magnitudë 6.3 Rihter ai ishte edhe më i fortë se tërmeti që solli vetëm dëme materiale në Shtator. Një tërmet që shënon viktima në Mamurras dhe Durrës.

Ndërsa ende nuk ka një bilanc përfundimtar të dëmit, sigurisht dëme të mëdha ekonomike janë shkaktuar. Ka një solidaritet të lartë nga vendet fqinje për t’u ardhur në mbështetje forcave të ushtrisë, policisë, e kryqit të kuq shqiptar.

Disa spitale private janë ofruar për shërbimin e emergjencës për këdo që ka nevojë.

Zjarrëfikësit e Napolit të Italisë, përmes faqes së tyre bëjnë të ditur se janë gati për t’u nisur për Shqipëri.

Forca të ushtrisë së Kosovës u nisën drejt Shqipërisë, ndërsa disa organizata dhe individë janë ofruar në mbështetje të njerëzve në nevojë.

Tërmeti i  muajit Shtator, edhe pse me më pak dëme, ishte një sprovë edhe për buxhetin e shtetit. Qeveria, në gjysmën e parë të vitit, akordoi një pjesë të buxhetit të fondit rezervë për arsimin e lartë, ndërkohë që tërmeti i Shtatorit solli nevojën e rishikimit të buxhetit. Qeveria është vënë në sprovë me buxhetin e saj të kufizuar për fondet rezervë të shtetit duke sjellë nevojën e rishikimit të buxhetit dhe rialokimin e fondeve të emergjencës.

Tërmeti i 26 Nëntorit, më i forti në 40 vitet e fundit sigurisht që do të kërkojë nevojën e një injeksioni të dukshëm financiar, ç’ka parashikon të sjellë një tjetër rishikim të buxhetit të shtetit. Fondi aktual i parashikuar në buxhet është rreth 2 miliardë lekë, vlerë kjo e ulët për mbulimin e dëmeve nga një katastrofë natyrore.

Ende nuk ka një sinjal nga Ministria e Financave rreth manovrës që do të ndiqet (në fazën e parë, emergjente është shpëtimi i jetës së njerëzve). Megjithatë, nisur nga të ardhurat e ulëta të realizuara, nga prodhimi i brendshëm apo eksportet, pritet që fondi të prekë investimet publike.