Google po rikthen intervistat fizike për punësim, pas shqetësimeve në rritje për mashtrimet e mundësuara nga inteligjenca artificiale gjatë proceseve virtuale të rekrutimit. CEO i kompanisë, Sundar Pichai, pranoi se duhet gjetur një balancë mes efikasitetit dhe autenticitetit, duke sugjeruar një qasje hibride. Ky vendim erdhi pas diskutimeve të brendshme, ku punonjësit shprehën shqetësime se integriteti i intervistave ishte vënë në dyshim.
Në një takim të brendshëm në shkurt, punonjësit e Google kërkuan drejtpërdrejt rikthimin e intervistave në ambientet e kompanisë.
“Mund t’i rikthejmë intervistat në zyrë?”, pyeti një punonjës, sipas audios së siguruar nga CNBC. “Ka shumë diskutime mbi këtë temë. Nëse buxheti është problem, a mund t’i sjellim kandidatët në një ambient që e kontrollojmë?”
Brian Ong, nënkryetar i rekrutimit në Google, pranoi sfidën, duke thënë se “duhet ende shumë punë për të integruar faktin që AI është tashmë shumë e pranishme në proceset e intervistimit.” Ai shtoi se intervistat virtuale janë mesatarisht dy javë më të shpejta se ato fizike, por kompania duhet të gjejë ekuilibrin mes shpejtësisë dhe saktësisë.
Lexo edhe:Satya Nadella ndan 5 prompt-e të ChatGPT që përdor çdo ditë në punë
Pichai e mbështeti idenë e një modeli të kombinuar: “Duke qenë se të gjithë punojmë në mënyrë hibride, mendoj se ia vlen që një pjesë e intervistave të zhvillohen fizikisht. Kjo do t’i ndihmojë kandidatët të kuptojnë më mirë kulturën e Google dhe është e dobishme për të dyja palët.” Komentet e Pichai-t pasqyrojnë një sfidë që po përballet i gjithë sektori i teknologjisë. Ong theksoi se “ky është një problem që po e shohin edhe të gjitha kompanitë tona konkurrente”, teksa organizatat përpiqen të ruajnë standardet e rekrutimit në një kohë kur mjetet e AI bëhen gjithnjë e më të sofistikuara dhe të vështira për t’u zbuluar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
