Arsimimi në inxhinieri ju garanton punë! Me këtë mesazh Ministri i Infrastrukturës dhe Energjisë Damian Gjiknuri ka ftuar të rinjtë të studiojnë në këtë fushë. Gjatë një takimi me studentë të Universitetit Politeknik të Tiranës, ai foli për të ardhmen e këtij sektori. Ndaj, nxiti të rinjtë të përqëndrohen në profilet e inxhinierisë, si rruga më e mirë për të siguruar të ardhmen e tyre.
“Me vjen mirë që ka një grup profesionistësh, të rinj, studentë, të cilët kanë të bëjnë me fushën me të cilën mua më ka rënë të ndaj përgjegjësitë në këtë qeveri. Nganjëherë e gjejmë të vështirë të gjejmë të rinj që shkojnë në shkencat teknike, aq më tepër që ndjekin fusha si inxhinieria, arkitektura, apo pjesa që lidhet me zhvillimin urban. Dua vërtet t’ju përgëzoj dhe ndihem mirë sepse e kam parë edhe në punën time sesa e vështirë është në këto kohë të gjesh njerëz të duhur, të talentuar”, nënvizoi Gjiknuri.
Sipas Ministrit, tregu i punës ka kërkesë për këto profile dhe pas viteve ’90 mungojnë burimet njerëzore.
“Nevoja është shumë e madhe. Ka nevoja shumë për pjesën inxhinierike. Ka shumë projekte, inxhinieri ndërtimi, apo qoftë gjeologu në fusha jo vetëm tek miniera. Gjeologjia është baza. Sa më mirë të njohësh gjeologjinë aq më i sigurtë është edhe projekti. Të gjitha dështimet që kemi ne në projekte publike po ta vini re, vijnë kryesisht për shkak të dështimeve gjeologjike” u shpreh Gjiknuri.
Pse ndodh kjo?! Sipas tij, sepse nuk janë bërë studimet siç duhet, i kanë rënë shkurt, i kanë bërë nga kompiuteri ose janë mjaftuar me disa të dhëna, pa marrë kampione, pa bërë analizat e shtresës së nëntokës dhe të gjitha këto kanë sjellë që në shumë nga këto projekte të famshme të ‘kërcejë’ çmimi. Ju e keni parë, që nga projektet e mëdha si rruga Durrës-Kukës, apo Rruga e Elbasanit, projekte shumë të rëndësishme, por kostot kanë vajtur të larta pikërisht nga mungesa e bërjes së punës siç duhet nga pikëpamja e projektimit.
Hekurudha dhe efiçenca e energjisë janë dy fusha të tjera konkrete, ku të rinjtë mund të formohen sipas Gjiknurit.
“Hekurudha është degraduar me vite. Ne po fillojmë një projekt të rëndësishëm Tiranë-Durrrës, rreth 100 milionë euro me mbështetjen e BERZH-it dhe të Komisionit Europian. Kjo do të hapë edhe një fushë të re sepse inxhinieria hekurudhore këtu ka dalë jashtë loje”.
Unë e kam vënë re që mungojnë profesionistë në këtë fushë, tha ai duke theksuar se, “Bërja e kësaj vepre të re dhe qoftë ringjallja e hekurudhës edhe me projekte të tjera që jemi duke aplikuar për të lidhur Shqipërinë me Greqinë apo me Maqedoninë do të krijojnë një fushë tjetër shumë të mirë, qoftë për inxhinieri civile për hekurudhat, por qoftë edhe nga pikëpamja e transportit hekurudhor”, tha ai.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
