Shqipëri-Kosovë, gratë sipërmarrëse angazhohen për të zhvilluar tregun e përbashkët - Business Magazine Albania

Shqipëri-Kosovë, gratë sipërmarrëse angazhohen për të zhvilluar tregun e përbashkët

Shqipëri-Kosovë, gratë ne biznes, sipërmarrje, marreveshje, bashkepunim, panair, trajnim, Antonela Hako, Linda Shala,

Gratë sipërmarrëse në Shqipëri dhe Kosovë angazhohen të zhvillojnë më tej marrëdhëniet ekonomike mes dy vendeve, duke fuqizuar gratë në biznes në të dy vendet.

Në Prishinë pati një mision biznesi të grave sipërmarrëse të fushave të ndryshme nga Shqipëria dhe Kosova. Në këtë event të përbashkët, Kryetarja e Dhomës Ekonomike të Gruas në Shqipëri (WECA), Antonela Hako dhe Drejtorja Ekzekutive e Dhomës Ekonomike të Kosovës (G7) Linda Shala, nënshkruan një marrëveshje bashkëpunimi. Kjo marrëveshje zyrtarizon bashkëpunimin e nisur, ende pa u krijuar Dhoma në Shqipëri, ku zonjat sipërmarrëse të Kosovës dhanë një mbështetje të veçantë.

Marrëveshja synon të nxisë projektet e përbashkëta në zhvillimin e tregut dhe fuqizimin e gruas.

Zonja Hako theksoi se, kjo marrëveshje do të çojë më tej bashkëpunimin e nisur mes bizneseve të drejtuara nga grate. “Ky takim ofroi mundësi konkrete për gra në fushën e shërbimit dhe prodhimit. Përmes takimeve B2B sipërmarrjet mund të gjejnë mundësi të reja në një epokë tërësisht të re”, tha Hako.

Zonja Shala, theksoi nga ana e saj se, “të dy vendet duhet të shfrytëzojnë momentin kur tregjet europiane po ikin nga lindja e largët dhe Ballkani perëndimor është një mundësi për të siguruar punë të reja për gratë sipërmarrëse dhe gratë punonjëse”.

Objektivi i dy Dhomave është fuqizimi i grave, përmes ndarjes së informacionit për tregjet, zhvillimit të panaireve, projekteve dhe trajnimeve të përbashkëta.

Memorandumi i Mirëkuptimit përfshin bashkëpunimin institucional për të vendosur marrëdhënie të ndërsjellta midis biznesve të të dyja vendeve. Ky memorandum mirëkuptimi, ka për qëllim bashkëpunimin reciprok për hartimin, shkrimin, implementimin dhe menaxhimin e projekteve të përbashkëta rajonale dhe europiane.

Krijimi i bashkëpunimit për zgjerimin e tregut, import-eksportit mes anëtarëve të dy Dhomave, duke nxitur aktivitete dhe përmirësime të ndryshme ligjore mes G7 dhe WECA.

Pas nënshkrimit të marrëveshjes, rreth 40 gra nga Kosova dhe Shqipëria zhvilluan takime B2B. Gjatë kësaj dite dinamike, Bordi i Dhomës Ekonomike të Gruas u prit edhe nga Ambasadori i Shqipërisë në Kosovë, z. Qemal Minxhozi.

Ai ofroi gatishmërinë e tij të mbështetjes për fuqizimin e gruas, veçanërisht në zonat ndërkufitare.

Aktualisht në Kosovë ka disa sipërmarrje të drejtuara nga gratë nga Shqipëria, të cilat kanë përfaqësitë dhe degët e tyre atje. Me programet e bashkëpunimit mes dy Dhomave synohet të rritet numri i bizneseve të ndërsjellta në të dy vendet, por edhe sipërmarrjet e përbashkëta.

Ky takim pritet të pasohet nga një konferencë për sipërmarrjet e grave në biznes gjatë muajit Shtator, ku presim të shohim edhe frytet e para të bashkëpunimit.

Vëmendja tek gruaja sipërmarrëse është e rëndësishme sot, pas efekteve të pandemisë. Të dhënat zyrtare të INSTAT tregojnë se pesha e bizneseve të drejtuara nga gratë në biznes, përveç se ishte e ulët, është ulur më tej gjatë pandemisë. Ajo ka zbritur në dy vitet e fundit nga 29% e totalit të biznesit në rreth 25%.

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #26 - Korrik 2021

Ditët e nxehta të kësaj vere mund t’i freskoni me artikujt e revistës 26 të Businessmag. Një numër i pasur me artikuj rreth sipërmarrjeve në fusha të ndryshme, por edhe profileve interesante të sipërmarrësve. Që në kopertinë vini re dy djem që po çojnë përpara sipërmarrjen e ngirur nga prindërit. Një model për t’u ndjekur nga shumë sipërmarrje të tjera. Idetë e reja, nismat e reja në biznes sot janë më të rëndësishme se kurrë për të mundësuar suksesin.
Zhvillimet në disa tregje mund t’i gjeni në brendësi të revistës. Të tilla janë tregjet e real estate dhe ai i shërbimit postar.

Zhvillimet në fushën e teknologjisë këtë vit vijnë me 10 gjetjet më të rëndësishme teknologjike, të cilat janë orientuar shumë drejt zhvillimeve shëndetore.

Diaspora vjen me profilin e një sipërmarrëseje në fushën e stilimit dhe qepjes së veshjeve. Ornela ka arritur të hapë tre dyqane shërbimi, ku përshtaten brandet më të mëdha sipas nevojave të klientit.

Edukimi është një temë e prekur nga ne në këtë numër, pasi sfidat e edukimit në këtë vit pandemik kanë qenë të mëdha. Sjellim dy akademi me zhvillimet e tyre dhe qasjen ndaj edukimit gjatë pandemisë, si dhe mundësinë e edukimit të fëmijëve në format më të mira të mundshme.

Në brendë…

Shiko më shumë
Na ndiqni në rrjetet sociale
0