Rumania investon 1 miliard euro për “Dracula Land”, një nga parqet tematike më të mëdha në Europë

Rumania ka prezantuar një projekt të madh turistik dhe argëtues të quajtur Dracula Land, një park tematik me vlerë rreth 1 miliard euro, që pritet të ndërtohet pranë Bukureshtit. Projekti synon të krijojë një destinacion të ri që bashkon argëtimin, turizmin, tregtinë dhe teknologjinë në një kompleks të vetëm.

Kompleksi do të shtrihet në një sipërfaqe prej 160 hektarësh. Në qendër të tij do të jetë Dracula Land Theme Park, një park argëtimi me rreth 780 mijë metra katrorë, i ndarë në gjashtë zona tematike dhe me më shumë se 40 atraksione të mëdha për vizitorët.

Një destinacion i plotë për turizëm dhe argëtim

Përveç parkut tematik, projekti përfshin edhe një sërë hapësirash të tjera që synojnë ta kthejnë zonën në një destinacion të rëndësishëm turistik.

Mes tyre janë:

• një arenë multifunksionale me 22,500 vende, e cila do të përdoret për koncerte, festivale dhe gara esports
• një zonë tregtare dhe gastronomike me dyqane dhe restorante
• tre hotele tematike – Dracula Grand Hotel, Dracula Family Hotel dhe Dracula Inn – që do të ofrojnë rreth 1,200 dhoma për vizitorët

Projekti parashikon gjithashtu edhe një park ujor dhe spa termale, një pistë për gara dhe motor sporte, si dhe një qendër për inovacion dhe zhvillim teknologjik, që do të mbështesë startup-et.

Lexo edhe: Çmimet u rritën në shkurt, inflacioni arriti nivelin më të lartë në shtatë muaj

Sipas themeluesit të projektit, Dragoș Dobrescu, ideja e “Dracula Land” është më shumë sesa një zhvillim i zakonshëm në pasuri të paluajtshme. Ai thekson se projekti përfaqëson një mundësi për të krijuar një simbol të ri për turizmin rumun. “Dracula Land bashkon përvojën time në zhvillimin e projekteve të mëdha me një histori që i jep kuptim çdo hapësire që ndërtohet,” është shprehur Dobrescu. Sipas tij, projekti synon të tregojë se Rumania mund të ndërtojë destinacione të rëndësishme ndërkombëtare, jo vetëm projekte të zakonshme ndërtimi.

Projekti po zhvillohet nga një ekip ndërkombëtar ekspertësh në arkitekturë, inxhinieri, financë dhe inovacion. Arkitekti Gino Garbellini, nga studioja italiane Piuarch Milano, thotë se “Dracula Land” është një projekt që bashkon arkitekturën moderne, teknologjinë dhe kreativitetin në një formë që rrallë shihet në Evropë. Edhe Andreea Mihai, drejtues në sektorin e retail dhe marketingut, thekson se projekti do të krijojë një hapësirë ku argëtimi, mikpritja, tregtia dhe kultura ndërthuren në një eksperiencë të vetme për vizitorët.

Përveç kompleksit fizik, zhvilluesit planifikojnë edhe një version virtual të Dracula Land në metaverse. Në këtë platformë digjitale, përdorues nga e gjithë bota do të mund të eksplorojnë një kopje virtuale të parkut dhe të përjetojnë eksperienca të ndryshme online. Projekti përfshin gjithashtu elementë të teknologjisë blockchain, si DraculaCoin, sisteme NFT për pronësi digjitale dhe përvoja të personalizuara përmes inteligjencës artificiale.

Sipas parashikimeve, projekti do të krijojë më shumë se 5,000 vende pune, të drejtpërdrejta dhe të tërthorta, në sektorët e turizmit, teknologjisë dhe shërbimeve. Në dhjetë vitet e para, ndikimi ekonomik i projektit mund të arrijë rreth 5 miliardë euro. Në fazën e parë të funksionimit, Dracula Land pritet të tërheqë rreth 3 milionë vizitorë në vit, duke u kthyer në një nga atraksionet më të mëdha turistike në rajon. Sipas Vlad Marinescu, president i International Esports Federation, projekti mund të shërbejë si një mënyrë e re për të prezantuar trashëgiminë kulturore të Rumanisë në botë. Ai thekson se nuk bëhet fjalë vetëm për një park argëtimi, por për një aset kulturor dhe ekonomik që mund të forcojë pozicionin e vendit në hartën globale të turizmit.

blooloop