Si Kristiani kishte dhjetëra nxënës shkolle, që më shumë se edhe ne të rriturit kanë nevojë për motivim, për disa rregulla jete bazë që mund t’i aplikojnë lehtësisht çdo ditë, e ta bëjnë jetën e tyre e të njëjrëzve përreth më të mirë.
Salla plot nuk përbëntë habi, as ditën e fundit kur dukej se ishin shtuar. Unë ndodhesha për herë të tretë aty, ndërsa për Kristianin ishte viti i dytë.
“Kur nxënësi është gati, mësuesi është aty”. Pjesëmarrësit e etur për të mësuar më shumë rreth mundësive të tyre për sukses, furnizuan Vasil Naçin me energjinë e nevojshme për të shkëlqyer për tre ditë rresht në skenë.
A e dini sa e rëndësishme është çfarë na thuhet? Kur ai ishte ende në shkollën 8 vjeçare, shoku i babait të tij e sfidon, duke i thënë që nëse do të dilte me të gjitha 10-a, do ta mbështeste të shkojë në shkollën “Skënderbej”, shkolla më e kërkuar atëherë. Kjo është një nxitje për trurin e adoleshentit. Por, fuqia ushqyese e trurit mendoj se ka lindur nga fjalët spontane të babait të tij, “ky po të dojë, del me të gjitha notat 10-a”. Besimi që na japin të tjerët, e mbi të gjitha vetëbesimi janë mes shtyllave më të rëndësishme të marrëdhënieve me njerëzit, të suksesit tonë. Sa herë na ka ndodhur të marrim një kompliment, e të mendojmë se shoku, miku apo familjari, nuk e ka seriozisht, madje ndoshta po na përqesh?! Po ne vetë si i flasim vetes? Çfarë fjalësh i themi?!
Në një komunitet ende në tranzicion ekonomik, me shumë probleme zhvillimi, vështirë të mund të flasim për një zhvillim shoqëror dhe qëndrim pozitiv injektues. Shumë prej nesh shmangin bisedat ankuese në kafene, për mungesën e rritjes së pagës, për faktin që këtu asgjë e mirë nuk po ndodh dhe diku jashtë është e ardhmja, e mira.
E nëse miqve e njerëze përreth u flasim në këtë mënyrë, shqetësimi është se po ia themi edhe vetës në të njëjtën kohë. Një prej pyetjeve që u shtruar në sallën e madhe në Expo City, ishte: të sillje në mendje 3 miqtë e tu. Unë i shkrova tre emrat, por kisha gabuar. Besoj edhe shumë miq të mi…
Ti kë do të rendisje…A e shkrove emrin tënd mes 3 miqve më të rëndësishëm?!
Fundja nëse nuk duam veten, si mund të duam të tjerët.
Lexo: Punë, disiplinë e këmbëngulje. Këshillat e sipërmarrësit Vasil Naçi për sukses
Vetja, jeta e shëndetshme (stili i jetës, ushqimi, meditimi, yoga), qëndrimi pozitiv, rrugëtimi për të përmirësuar veten dhe të tjerët, ishin tema që mbajtën mbërthyer për tre ditë në fundjavë mbi 2000 persona të ardhur nga i gjithë rajoni.
Krahas takimit të miqve të vjetër, unë arrita të njoh e të krijoj miqësi të reja. Mes tyre njoha edhe Mimoza Thaqin, sipërmarrësja dhe folësja motivuese nga Maqedonia e Veriut. Ajo është pjesë e ekipit Rruga drejt Suksesit, ashtu si Eglent Bici, sipërmarrës në fushën imobiliare, me një kontribut të madh në rrjetet sociale për motivimin e të rinjve. I gjithë komoditeti dhe trajtimi i çdo pjesëmarrësi si lider është meritë e një pune organizative me ekipin Rruga drejt Suksesit.
Por, çfarë i bëri pjesëmarrësit dhe veçanërisht adoleshentët t’i mbarojnë të gjitha fletët e bardha në fund të librit, me shënime për rregulla që në shkollë pak i prekin, por jetike për mirëqenien?!
Për shumë pjesmarrës të pyetur aty, më e rëndësishme është se kush po flet. Po flet një sipërmarrës i suksesshëm, i përulur, një nxënës i etur për të mësuar më tej dhe një person që do ta ndajë njohurinë dhe mirënjohjen me të tjerë.
Një tjetër pyetje që të lind kur shikon një komunitet kaq të gjerë është se çfarë i bën bashkë sipërmarrës, punonjës, të rinj e të moshuar, studiues. Përgjigjia gjendet po aty. Ka shumë ngjashmëri mes rregullave të menaxhimit të vetes dhe atyre të menaxhimit të një biznesi, ndaj mesazhet e ndara vlejnë si për individin edhe për kompaninë. Pra, sipërmarrje është të rrisësh e të përmirësosh veten, po aq sa edhe biznesin. Dhe nëse ke bërë të parën, mund të bësh edhe të dytën.
Arjeta Dhima, ventriloquistja e vetme në vend, themeluese dhe drejtuese e iACT, është aty për të mësuar sërish dhe për të ndjekur pikërisht progresin e fjalës, fjalimit të folësit motivues, pas punës së bërë pas skenës me folësin. Edhe mentorët kanë nevojë për mentorë, e mes njerëzve të tillë mentorimi është i ndërsjelltë.
Në një periudhë kur shumë të rinj duan të largohen jashtë vendit dhe nuk gjejnë shpresë në vendin e tyre, sjellja e shembujve të mirë, ndryshimi i këndvështrimit dhe qëndrimi pozitiv ndaj situatave bëhet më edhe më i rëndësishëm. Ndaj mediat sociale kanë “vluar” menjëherë pas përfundimit të eventit, me foto, falenderime e mesazhe mirënjohje.
Prej të djelës pasdite, Kristiani ka shtuar dozën e qëndrimit pozitiv, përkujdesjes për vëllain e tij dhe shokët dhe besoj edhe vlerësimin për veten.
Ja disa prej mesazheve të Rruga drejt Suksesit
Disa gjëra nuk mund të delegohen!
Fokusohu tek pikat e forta për t’i zhvilluar!
Fokusohu tek dobësitë për t’i përmirësuar!
Vetëdisiplinohu!
Ji krenar për punën tënde, për mendësinë tënde të rritjes!
Ki kujdes çfarë i thua vetes!
Nëse nuk gjen burimin e problemit dhe një sistem që të mos përsëritet, nuk ke dhënë zgjidhje!
Universi nuk të jep një sfidë pa të dhënë edhe një zgjidhje!
Duaje trupin tënd!
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
