Guvernatori Gent Sejko ka komentuar situatën makroekonomike në vend pas mbledhjes së Këshillit Mbikëqyrës të Bankës së Shqipërisë.
Në lidhje me temën më aktuale për xhepat e qytetarëve, ajo e rritjes së çmimeve, Sejko u shpreh se ajo do të jetë e ndjeshme dhe mund të përbëjë një rrezik për rimëkëmbjen e ekonomisë, por në parashikimet fillestare ajo mbetet kalimtare. Sipas Bankës, çmimet pritet të stabilizohen fillimin e vitit të ardhshëm.
“Çmimet e lëndëve të para, të ushqimeve dhe produkteve energjetike kanë njohur një rritje të shpejtë muajve të fundit. Kjo rritje ka pasqyruar si rimëkëmbjen e kërkesës botërore, ashtu edhe vështirësitë që ka pasur niveli i ofertës në nivelet e parakrizës. Ky ndikim pritet të jetë kalimtar, por ai përbën një faktor rreziku për nivelin e inflacionit dhe potencialisht për shpejtësinë e rimëkëmbjes ekonomike. Këshilli Mbikëqyrës është i gatshëm të rishikojë politikën monetare, në mënyrë që ai të jetë në përputhje me objektivin tonë të inflacionit.” – u shpreh Sejko.
Lexo: Sejko: po përmirësohet ritmi i rritjes ekonomike
Guvernatori, foli edhe për nivelin e punësimit në vend, duke e konsideruar ende të dobët:
“Pavarësisht tendencave përmirësuese, niveli i punësimit vazhdon të jetë më i ulët dhe shkalla e papunësisë më e lartë se nivelet para pandemisë. Kthimi i ekonomisë në punësim të plotë duket se kërkon më shumë kohë dhe mbështetje të vazhduar me stimuj makroekonomikë.”
Guvernatori u shpreh se rritja ekonomike në Shqipëri sipas parashikimeve pritet të jetë në nivelin 7%, afërsisht i njëjti edhe me parashikimet e Bankës Botërore.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
