Emisioni më i ndjekur televiziv në Kinë, gala e Vitit të Ri Hënor e transmetuar nga CCTV, po përdoret këtë vit për të treguar ambicien e vendit në teknologji, veçanërisht në robotët humanoidë dhe inteligjencën artificiale.
Katër startup-e kineze, Unitree Robotics, Galbot, Noetix dhe MagicLab, do të prezantojnë robotët e tyre në këtë event madhor, i cili në Kinë ka rëndësi të ngjashme me Super Bowl në SHBA. Ky interes i madh për robotët humanoidë vjen në një moment kur disa prej këtyre kompanive po përgatiten të dalin në bursë, ndërsa shumë startup-e të AI po prezantojnë produkte të reja gjatë pushimeve të Vitit të Ri Hënor.
Vitin e kaluar, publiku u mahnit kur 16 robotë humanoidë vallëzuan në sinkron me artistë njerëzorë në skenë. Pak javë më vonë, themeluesi i Unitree u takua edhe me Presidentin e Kinës, Xi Jinping, çka tregon vëmendjen e lartë që po i jepet këtij sektori. Shteti kinez po e mbështet fort zhvillimin e robotikës dhe inteligjencës artificiale. Në një vit, Presidenti Xi është takuar me disa themelues startup-esh në robotikë, duke i dhënë këtij sektori një rëndësi të veçantë publike dhe politike. Gala e CCTV-së përdoret prej vitesh për të promovuar arritjet teknologjike të Kinës.
Lexo edhe: A mund infrastruktura e Evropës të përballojë boom-in e inteligjencës artificiale?
Ekspertët thonë se robotët humanoidë përmbledhin disa nga pikat e forta të Kinës: teknologjinë e AI, prodhimin e pajisjeve dhe ambicien për të qenë lider global në industri. Për publikun dhe institucionet, robotët me pamje njerëzore janë më të lehtë për t’u kuptuar dhe për t’u “pranuar” si teknologji e së ardhmes. Sipas të dhënave të fundit, Kina ka prodhuar shumicën dërrmuese të robotëve humanoidë në botë vitin e kaluar dhe pritet që këtë vit shitjet të rriten ndjeshëm. Edhe Elon Musk ka pranuar se konkurrentët më të fortë për Teslën në fushën e robotëve do të jenë kompanitë kineze.
Për momentin, shumica e robotëve humanoidë përdoren ende në projekte testuese dhe demonstrime, kryesisht në fabrika, logjistikë dhe ambiente industriale. Disa prej tyre po testohen në fabrika të mëdha dhe në pika kufitare për ndihmë në punë mbështetëse. Kompanitë kineze po punojnë fort edhe për “trurin” e robotëve, pra inteligjencën artificiale që i ndihmon të kuptojnë ambientin, të dëgjojnë komandat e njerëzve dhe të kryejnë detyra gjithnjë e më të ndërlikuara. Ekspertët thonë se shfaqjet spektakolare, si salto apo valle, duken bukur për publikun, por sfida e vërtetë teknologjike është kur një robot arrin të kryejë me saktësi detyra të thjeshta, si të marrë një gotë uji pa e derdhur.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
