Qeveria ka rritur me 24% buxhetin për bujqësinë, nga 8.5 mld që ishte këtë vit në 10.5 mld lekë në 2016-n. Peshën më të madhe e zë rehabilitimi dhe mirëmbajtja e sistemeve të ujitjes, kullimit dhe mbrojtjes nga përmbytjet, ku do të alokohen 4.3 mld lekë, ose 70% më shumë se një vit më parë.
Një pjesë e fondit do të administratohet nga pushteti lokal.
“Masa që do të alokohet në këtë drejtim llogaritet në 1.8 mld lekë, që i shkon mbështetjes së infrastrukturës së kullimit, përmes Fondit të Zhvillimit të Rajoneve që transferohet te pushteti lokal”, tha Edmond Panariti, ministër i Bujqësisë.
“Ministria e Bujqësisë do të kishte dashur 6 muaj kohë, para se t’u kalonte fondet bashkive, pse? Bordet e kullimit kërkojnë ridimensionim dhe fuqizim. 3/4-tat e tyre nuk kanë një inxhinier hidro”, tha deputeti demokrat Genc Ruli.
Një tjetër komponent me rëndësi është ai i zhvillimit rural dhe subvencioneve, me 3.5 mld lekë. Por opozita thotë se, skema aktuale e mbështetjes duhet të ndryshojë, pasi ajo favorizon agropërpunuesit dhe lë jashtë vëmendjes fermerët.
“Sektori tregtar dhe ai i prodhimit e kanë ende aksesin për të marrë kredi. Fermeri nuk e ka, pra jemi treguar të lirë me atë që e ka mundësinë, si dhe të shtrënguar me atë që nuk e ka”, tha më tej deputeti Ruli.
“Do të ndihmohen edhe drejtpërdrejt, por do ta balancojmë me mbështetjen e targetuar si investim në pikat e grumbullimit, sepse shkalla e përfituesve është shumë më e madhe, sesa po t’i orientojmë në mënyrë individuale”, tha ministri Panariti.
Ministri Panariti thotë se, kjo skemë ka funksionuar deri më tani dhe ka orientuar bujqësinë drejt tregjeve të mëdha.
/Top-Channel/
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
