Projektbuxheti i vitit 2016, rriten pensionet, ulet borxhi


Projektbuxheti i vitit 2016, i miratuar nga qeveria dhe i prezantuar dje pasdite në konferencën e Kryetarëve nga Ministri i Financave, Shkëlqim Cani ndjek një politikë të shtrënguar shpenzimesh, teksa ul ndjeshëm fondet për arsimin dhe infrastrukturën. Por, bazuar në shifrat reale që nxjerr, ajo çka vihet re është reforma në administratë që do të pezullojë nga puna 7200 persona, do të ruhet niveli aktual i pagave, do të rriten pensionet dhe do të përshpejtohet procesi i kompensimit të pronarëve. Sa u përket ish-të përndjekurve, skema që ka ndjekur qeveria gjatë këtij viti, do të aplikohet edhe në 2016-n, me të njëjtin fond të vënë në dispozicion.

Reformë në administratë

Qeveria parashikon shkurtime të vendeve të punës në administratë. Krahasuar me buxhetin e vitit 2015, numri i punonjësve do të ulet në masën 8.1 për qind. Nëse neni 11 i buxhetit të vitit 2015 referon një numër të përgjithshëm të punonjësve që arrin 88 550, projektbuxheti i vitit që vjen parashikon ta ulë këtë numër me 7200, duke e çuar në total, 81 350 punonjës. Reforma që do të ndërmarrë qeveria, udhëzon që institucionet të mos e kalojnë numrin maksimal të punonjësve, ndërsa, sa u përket shkurtimeve, ato do të shtrihen në të gjitha ministritë dhe institucionet e varësisë.

Pagat dhe pensionet

Sa u përket pensioneve, qeveria parashikon rritje të tyre, me fondin prej 1.1 miliardë lekësh. Ndërkohë, shpenzimet për sigurimet shoqërore janë rritur me 5.4 për qind, duke shkuar nga 106.4 miliardë lekë në 2015, në 112.1 miliardë lekë në vitin e ardhshëm. Rritje parashikohet edhe për zërin sigurime shëndetësore, shpenzimi për të cilat do të rritet me 4.1 për qind, ose 1.4 miliardë lekë, duke shkuar në 36.2 miliardë për vitin 2016. Megjithëse skema deficitare e pensioneve është përmirësuar vitin e fundit (raporti përfitues kontribuues për herë të parë në 2014 u barazua), sërish në buxhet parashikohet një rritje prej 6.5 për qind (9.3 miliardë lekë) e shpenzimeve për fondet speciale.

Ndërsa, projektligji i buxhetit do të diskutohet ditët në vijim në komisionet parlamentare, shifrat në projektligj nuk parashikojnë rritje të pagave, por referojnë edhe ulje të shpenzimeve. Shpenzimet për personelin për vitin 2016 parashikohen në rënie 4.5 për qind në vitin 2016, duke u ulur në 71.4 miliardë lekë në 2016, nga 74.6 miliardë lekë që ishin në total në vitin 2015. Rënie të dukshme prej 4.3 për qind shënon edhe fondi i pagave për administratën. Ndërkohë neni 12 i projektligjit, i cili referon pagën e presidentit, mbetet i pandryshuar edhe në vitin 2016, duke e lënë këtë pagë 257 mijë lekë.

Pronarët

Fondi i akorduar për pronarët parashikohet me rritje. Buxheti i vitit 2015 u miratua me një fond prej 1.4 miliardë lekësh, ndërsa për vitin 2016, shuma që parashikohet për kompensimin e pronarëve për vitin që vjen është 3 miliardë lekë, nga të cilat 2 miliardë parashikohen transferime nga buxheti i shtetit dhe 1 miliardë lekë, të ardhura të tjera.

Ish-të përndjekurit

Ashtu si në vitin që po lëmë pas, për shpërblimin e ish-të përndjekurve politikë, do të vihen në dispozicion 2 miliardë lekë, çka mendohet që pagesa ndaj tyre të bëhet me ritmin e këtij viti dhe përfitimet të jenë në të njëjtin nivel me këtë vit. Por, pagesa për këtë kategori është specifike, pasi ajo bëhet në varësi të dokumentacionit që dorëzohet dhe të dhënave, që duhet të jenë të plota e të sakta. Për dëmshpërblimin e ish-të përndjekurve, mendohet që skema të mos ndryshojë, dhe në radhën e individëve me përparësi të jenë gratë që kanë vuajtur dënime, e që janë gjallë, duke u pasuar nga ish-të dënuarit mbi 75 vjeç dhe ish-të dënuarit, të cilët vuajnë nga sëmundje të rënda.

Buxheti

Të ardhurat për buxhetin e vitit të ardhshëm do të jenë rreth 417 694 milionë lekë, ndërsa shpenzimet 452 152 milionë, pra me një deficit prej 34 431 milionë lekë. Buxheti 2016 do të përbëhet nga buxheti i shtetit, buxheti vendor dhe fondet speciale, siç janë sigurimet shoqërore, sigurimet shëndetësore dhe kompensimi i pronarëve. Për skemën e sigurimeve shoqërore parashikohen të jenë rreth 108 180 milionë lekë, ku 58 milionë jepen për rritjen e pensioneve.

/Shekulli/

Must watch
Business Mag Nr. #25 - Mars 2021

Kjo periudhë përkon me një vit të plotë në kushte pandemie në vendin tonë, në Europë dhe në mbarë botën. Në një vit ndodhën shumë zhvillime, të paparashkuara ndonjëherë më parë nga ne, duke hedhur poshtë shumë plane apo projekte tonat për rritjen. Por, në këtë kohë sipërmarrje të ndryshme u vunë në lëvizje për të gjetur zgjidhje të reja e për të siguruar mbijetesën.

Në këtë numër të revistës, vijnë zhvillimet përmes gjurmëve që kanë lënë tek industri, sipërmarrje apo individë sipërmarrës.

Pano Soko, ekonomist i njohur flet për efektet e paketave ekonomike të mbështetjes dhe nevojën për paketa ndihme në industritë e prekura.

Rubrika 3X3 i kushtohet industrisë së verërave. Nga intervistat tona me 3 prodhues rezulton se

verërat shqiptare janë të “paralizuara” nga pandemia.

Verërat janë në një trend me turizmin. Brunila Liçaj, profesore dhe eksperte në fushën e turizmit është optimiste për të ardhmen e kësaj fushe.

Në rubrikën e brandeve kemi sjellë, fabrikën e qumështit dhe prodhimeve të bulmetit “Lufra”, ndërsa një brand që po rimëkëmbet nga Kosova është prodhuesi i këpucëve artizanale “Perolli”. Të dy këto brande janë model frymëzimi për njerëzit e punës!

Një pjesë e rëndësishme e revistës i dedikohet konkursit dhe fituesve të Businessmag në …

Shiko më shumë
Na ndiqni në rrjetet sociale