Po e shkatërron baterinë e telefonit pa e kuptuar – 4 gabime që nuk duhet t’i bëni më!

Karikimi i telefonit është një pjesë rutinore e jetës së përditshme për të cilën shumica e njerëzve nuk mendojnë dy herë — por disa zakone të gabuara të karikimit mund të dëmtojnë baterinë e telefonit tuaj. Në një moment, mund të vini re se bateria nuk zgjat aq sa dikur. Për shembull, nëse më parë e kalonit një ditë pune pa e karikuar telefonin, tani mund t’ju duhet ta karikoni dy herë para se të largoheni nga puna.

Telefonat përdorin bateri litium-jon, të cilat u bënë thelbësore për teknologjinë portative në vitet ‘90 falë dendësisë së tyre të lartë të energjisë. Këto bateri ruajnë një sasi të madhe energjie në një hapësirë të vogël, karikohen shpejt dhe zgjasin më shumë se bateritë e tjera — por kjo nuk do të thotë se janë të përjetshme. Sandeep Unnikrishnan, shefi i teknologjisë në start-up-in e teknologjisë së baterive Lionvolt, shpjegoi për The Independent se jetëgjatësia e baterisë së një telefoni përkeqësohet me kalimin e viteve “për shkak të konsumit të brendshëm elektrokimik”. Zakonisht, një bateri telefonike zgjat rreth 500 cikle karikimi — ose diku midis dy deri në tre vjet — përpara se kapaciteti i saj të zvogëlohet ndjeshëm. Por ka disa gjëra që mund të bëni për të zgjatur jetëgjatësinë e baterisë sa më shumë të jetë e mundur.

1. Mos e karikoni telefonin 100%

Edhe pse mund të duket si një ide e mirë për ta mbajtur baterinë e mbushur gjatë gjithë ditës, në fakt kjo mund ta dëmtojë atë në planin afatgjatë. Kjo ndodh sepse “bateritë litium-jon përjetojnë më shumë stres kur mbahen plotësisht të karikuara për periudha të gjata kohore”, shpjegon Unnikrishnan. Mbajtja e telefonit në 100% krijon tension të panevojshëm, duke përshpejtuar degradimin e baterisë. Në vend të kësaj, ai rekomandon ta mbani nivelin e baterisë midis 20% dhe 80% për një jetëgjatësi më të madhe të ciklit të karikimit. Unnikrishnan sugjeron ta karikoni telefonin gjatë ditës, në vend që ta lini të karikohet gjatë natës, që ta monitoroni nivelin e tij të ngarkesës dhe ta shkëpusni përpara se të arrijë kapacitetin maksimal.

Lexo edhe:8 ndërtesat e pazakonta të Tiranës!

2. Aktivizoni opsionin e karikimit të optimizuar

Shumica e telefonave kanë një sistem të menaxhimit të baterisë, i cili ndihmon në ruajtjen e jetëgjatësisë së saj pa pasur nevojë të bëni asgjë. Në iPhone, nëse hyni te “Battery Charging & Health” te cilësimet, do të gjeni opsionin për të aktivizuar “Optimized Battery Charging”. Ky funksion analizon rutinën tuaj të karikimit dhe përdorimin e përditshëm të telefonit për të përcaktuar kur ai duhet të karikohet mbi 80%. Ndërsa në Android, ekziston një funksion i ngjashëm i quajtur “Adaptive Charging”, i cili gjithashtu ndihmon në optimizimin e jetëgjatësisë së baterisë.

3. Mos e përdorni telefonin gjatë karikimit

Temperatura e telefonit luan një rol kyç në jetëgjatësinë e baterisë, dhe si nxehtësia ashtu edhe i ftohti ekstrem mund të shkaktojnë degradimin e elektrodave. Eksperti këshillon të mos e përdorni telefonin gjatë karikimit, sepse kjo gjeneron nxehtësi të tepërt dhe përshpejton degradimin kimik. Po ashtu, mos e mbani telefonin poshtë jastëkut apo mbuluar me batanije, sepse kjo e ngroh më shumë dhe ndikon negativisht në jetëgjatësinë e baterisë.

4. Përdorni karikuesin origjinal të telefonit

Edhe pse mund të jetë tunduese të blini një karikues të reklamuar si karikues i shpejtë, përdorimi i tyre shpesh mund të dëmtojë baterinë. Është më mirë të përdorni karikuesin e rekomanduar nga prodhuesi i telefonit tuaj. “Karikimi i shpejtë ofron komoditet, por përdorimi i shpeshtë mund të jetë i dëmshëm,” shpjegon Unnikrishnan. Ai shton se karikuesit e lirë dhe jo standardë duhen shmangur, pasi mund të ofrojnë tension ose rrymë të paqëndrueshme, duke rrezikuar mbinxehjen e telefonit.

Nëse dëshironi që bateria e telefonit tuaj të zgjasë më shumë, është e rëndësishme të adoptoni këto zakone të duhura të karikimit.

nypost