Për në Gjermani tani mjafton vetëm vula Apostille - Business Magazine Albania

Për në Gjermani tani mjafton vetëm vula Apostille


Pas Italisë dhe Belgjikës në muajin Dhjetor edhe Gjermania filloi zbatimin e regjimit pa legalizim të dokumenteve sipas Konventës së Hagës. Ky hap u kursen qytetarëve kohë dhe shpenzime.

Nisur prej modernizimit dhe garancive të rregullshmërisë së dokumenteve që lëshohen nga administrata shqiptare, Gjermania vendosi të pranojë zbatimin reciprok të regjimit pa legalizim të dokumenteve, i njohur si regjimi i Apostille-s. Nëpërmjet këtij vendimi përmirësohen ndjeshëm shërbimet ndaj qytetarëve që duhet të paraqesin dokumente në Gjermani ose anasjelltas.

Nga kjo marrëveshje përfitojnë të gjithë personat që u duhet të përdorin dokumente gjermane në Shqipëri, pra jo vetëm shtetasit shqiptarë por edhe ata gjermanë apo të tjerë.

Cili është përfitimi i qytetarëve prej kësaj marrëveshjeje?

Deri tani mes Shqipërisë dhe Gjermanisë përdorej procedura e legalizimit të dokumenteve, pra procedura e njohjes së rregullshmërisë së dokumentit të huaj. Sipas kësaj procedure duhej që dokumentet me parë të certifikoheshin tek autoritetet gjermane e pastaj në Ambasadën e Republikës së Shqipërisë, ku diplomatët konsullorë konfirmojnë funksionarin përgjegjës dhe institucionin, përkatësisht duke vërtetuar nënshkrimin dhe vulën.

Me zbatimin e regjimit pa legalizim të dokumenteve sipas Konventës së Hagës “Për heqjen e detyrimit të legalizimit të dokumenteve zyrtare të huaja” të 5 tetorit 1961 mjafton që dokumentet thjesht të pajisen me vulën Apostille nga autoritetet gjermane dhe mund të përdoren si të tilla edhe në Shqipëri.

Aplikimi i vulës Apostille për dokumentet e huaja u kursen të interesuarve jo vetëm kohë por edhe shpenzime. “Së pari tani e tutje atyre nuk u duhet të paguajnë më tarifën e legalizimit të dokumenteve. Së dyti duke pasur parasysh kohën e gjatë dhe mbingarkesën që mbarte legalizimi i dokumenteve, si dhe shqetësimin për afatet shumë herë të kufizuara të vlefshmërisë së disa dokumenteve, tani është e dukshme se procedura shkurtohet shumë në kohë, gjë që u lehtëson ndjeshëm jetën të gjithë qytetarëve që dërgojnë për arsye të ndryshme dokumente në Shqipëri.” – tha për Deutsche Wellen Belinda Shtylla, konsulle pranë Ambasadës shqiptare në Berlin.

Ana tjetër pozitive është se në zbatim të reciprocitetit, edhe shtetasve shqiptarë që do të përdorin dokumente shqiptare në Gjermani, thjesht do t’u duhet t’i apostilojnë, pra t’i pajisin me vulën Apostille, dokumentet në Ministrinë e Jashtme në Tiranë, pa qenë më e nevojshme të kryejnë legalizime në Ambasadën e RFGj-së në Shqipëri.

Ku merret vula Apostille, që kërkohet tani nga autoritet përkatëse?
Vula Apostille merret në Shqipëri vetëm në Ministrinë e Punëve të Jashtme në Tiranë, ndërsa në Gjermani ato që apostilojnë dokumentet, janë autoritetet kompetente të landeve. Këto autoritete janë të listuara në websitet për informimin e qytetareve: Bezirksregierung, Regierungspräsidium, Landesverwaltungsamt, Bundesverwaltungsamt apo Ministria e Brendshme dhe Landgericht, në rastin e akteve noteriale dhe gjyqësore, sqaron konsullja e Ambasadës shqiptare në Berlin.

Burimi: gazeta-shqip.com

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #37 - Prill 2025

Mendo lokalisht, vepro globalisht

Viti 2025 vjen me sfida dhe mundësi të mëdha në sektorë të rëndësishëm të ekonomisë sonë. Turizmi shqiptar po përjeton një rritje të jashtëzakonshme, ku duket se pas një prezantimi mbresëlënës në ITB Berlin, Shqipëria është gati të pozicionohet si një destinacion i rëndësishëm në hartën botërore me një ofertë të larmishme turistike. Paralelisht, tregu i pasurive të paluajtshme po përballet me ndyshime të shumta, ku investimet strategjike dhe zhvillimi i qëndrueshëm janë kyç për suksesin e këtij sektori.
Teknologjia vazhdon të transformojë mënyrën se si jetojmë dhe punojmë. Inteligjenca Artificiale nuk është më thjesht një mjet ndihmës, por një faktor vendimtar që po shkruan rregulla të reja në çdo industri.

Bota përballë sfidës së krijimit të një axhende më humane për Inteligjencën Artificiale – si mund ta vendosim atë në shërbim të njeriut, pa e shndërruar në një rrezik për demokracinë dhe ekonominë globale? Ndërsa jetojmë në një botë që ndryshon vazhdimisht, shohim sesi Fintech është një realitet i padiskutueshëm që po lehtëson ditë pas dite jetën dhe veprimtarinë e bizneseve dhe individëve. Ajo që konfirmojmë me siguri në këtë edicion është sesi bizneset shqiptare po përqafojnë gjithnjë e më shumë një qasje europiane në menaxhim, kulturë, lidership dhe investime, duke u nxitur drejt inovacionit dhe …

Shiko më shumë
Na ndiqni në rrjetet sociale
0