Ata që duan të zgjerojnë aktivitetin, të rrisin investimin, përmes mundësive financiare të ofruara nga tregu përmes granteve, kredive apo nismave të tjera financuese, përfshirë ministrinë e Financave dhe Ekonomisë dhe AIDA-n, ftohen të njihen me mundësitë që ofron platforma ‘Akses në Financë’, mundësuar nga BERZH.
Platforma ‘Akses në Financë’ është krijuar për t’u shërbyer Ndërmarrjeve të Vogla dhe të Mesme shqiptare, të cilat duan të zgjerojnë dhe investojnë në aktivitetin e tyre duke përfituar nga mundësitë financiare që tregu ofron, me grante, kredi apo nisma të tjera financuese. Në njoftim theksohet se kjo platformë online do të ofrojë një shërbim “one-stop-shop” me informacione që lidhen drejtpërdrejt me aksesin në financë për NVM-të, i cili ofrohet nga institucione, organizata apo kompani të ndryshme private dhe publike, kombëtare e ndërkombëtare.
Qëllimi kryesor i këtij projekti është të mbështesë Qeverinë Shqiptare në krijimin dhe zbatimin e politikave dhe masave mbështetëse për NVM-të, për të zbutur ndikimin negativ ekonomik të COVID-19. Masat konkrete, të mbështetura përmes këtij projekti, do të synojnë digjitalizimin e NVM-ve si një mjet efektiv për përshtatjen dhe rikuperimin e krizës pandemike.
Informacioni i përditësuar, mbi thirrje të ndryshme për aplikime nga NVM-të shqiptare, do të mirëmbahet dhe menaxhohet nga Agjencia Shqiptare e Zhvillimit të Investimeve, AIDA ( www.aida.gov.al ), si përfituese direkte e mbështetjes nga BERZH në këtë projekt.
Lexo: Shqiptari që po punon për Silicon Valley
Sipas njoftimit, ndërtimi i platformës “Akses në Financë”, është bërë i mundur me rekomandimin e Ministrisë së Financave dhe Ekonomisë si dhe mbështetjen e Bankës Europiane për Rindërtim dhe Zhvillim, BERZH.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
