Një kualifikim i ri sipas nevojave të sektorit të turizmit, me mbështetjen e projektit “Aftësi për Punë”

Me rritjen e numrit të turistëve dhe të investimeve në këtë sektor, nevoja për specialistë dhe teknicienë të fushës është e domosdoshme për të mbështetur kërkesat e tregut të punës në vend dhe ndërtimin enjë modeli të qëndrueshëm. Një studim i realizuar së fundmi mbi profesionet dhe aftësitë e reja profesionale të kërkuara në industrinë e turizmit në Shqipëri nxjerr në pah nevojën për një kualifikim të ri në pozicionin “Menaxher i Mesëm në Hoteleri”.Agjencia Kombëtare e Arsimit, Formimit Profesional dhe Kualifikimeve (AKAFPK) , me mbështetjen e projektit ”Aftësi për Punë“ (S4J), po punon për të hartuar një program të ri, të nivelit të V-të, njohur si “program pas të mesmes”, që do të jetë pjesë e Kornizës Shqiptare të Kualifikimeve (KSHK). Takimi i parë i grupit të punës për hartimin e standardit të profesionit dhe funksioneve kryesore u organizua më 11 mars 2024, me pjesëmarrjen ekspertëve të përzgjedhur nga industria dhe mësuesve me përvojë nga
ofruesit e AFP-së. Takimi u moderua nga Ejvis Gishti, Drejtore e Përgjithshme e AKAFPK. “Ofrimi i kualifikimeve profesionale në përputhje me ndryshimet ekonomike dhe sociale, si dhe nevojave të tregut të punës është pjesë e vizionit tonë për AFP-në. Projekti “Aftësi për Punë” është prej vitesh një partneri i rëndësishëm i agjencisë për të mundësuar identifikimin dhe hartimin e kualifikimeve të reja.” ishin fjalët e Ejvisit.
Shkolla Tregtare në Vlorë dhe Shkolla Hamdi Bushati në Shkodër janë dy institucionet e para të Arsimit dhe Formimit Profesional (AFP) që do ta lëvrojnë këtë program studimi, si pjesë e angazhimit për të mundësuar një ofertë të përputhur me nevojat e tregut të punës. Programi do të ofrohet në partneritet me biznesin lokal, në formën e trajnimit bashkëpunues. Më herët, për nivelin e V-të të Kornizës Shqiptare të Kualifikimeve, projekti “S4J” ka kontribuar në hartimin e standardit të profesionit dhe standardit të kualifikimit të ri “Ndërmjetësim i Pasurive të Paluajtshme” dhe përditësimin e “Menaxhim Diagnostikim në Autoservis”.

Lexo edhe: Liderët e biznesit në Shqipëri për vitin 2023, më të votuarit në Business Magazine

Për zv. menaxheren e projektit “Aftësi për Punë”, Znj. Erka Çaro “Tranzicioni i shpejtë social-ekonomik kërkon medoemos reagimin e menjëhershëm të institucioneve ofruese të arsimit dhe formimit profesional për të mundësuar ofertë mësimore relevante në raport me kërkesat e tregut të punës. Në këtë prizëm, projekti “Aftësi për Punë”, frymëzuar nga modeli zviceran, prej disa vitesh është angazhuar të kontribuojë në diversifikimin e ofertës mësimore dhe lëvrimin e saj me përfshirjen e ngushtë të sektorit privat.”
Kualifikimi “Menaxher i Mesëm në Hoteleri”, niveli i V i KSHK, si pjesë e Katalogut Kombëtar të Kualifikimeve Profesionale pritet të kontribuojë në aftësimin e të rinjve dhe të punëmarrësve që synojnë të përmirësojnë nivelin e tyre të arsimimit për të arritur një pozicion më të mirë në sektorin e hotelerisë. Në përfundim të programit, pjesëmarrësit do të pajisen me certifikatën profesionale dhe suplementin përkatës të nivelit.
Rreth projektit “Aftësi për Punë”
Aftësi për Punë është një projekt i Agjencisë Zvicerane për Zhvillim dhe Bashkëpunim (SDC), i cili zbatohet në Shqipëri nga organizata Swisscontact. Fokusi kryesor i projektit është përmirësimi i arsimit dhe formimit profesional (AFP) në Shqipëri përmes digjitalizimit, modernizimit dhe gjithëpërfshirjes.