Ministrja e Ekonomisë dhe Inovacionit, Delina Ibrahimaj, deklaroi sot se biznesi shqiptar mbetet aktori kyç në arritjen e qëndrueshmërisë, rritjes ekonomike dhe integrimit të plotë të vendit në tregun e përbashkët europian. Duke folur në konferencën “Business 2030 – A Sustainable Future Made in Albania”, të organizuar nga UNDP Albania, Ambasada e Suedisë dhe partnerë të tjerë vendas e ndërkombëtarë, ajo theksoi se sfidat e zhvillimit të qëndrueshëm kërkojnë angazhim të menjëhershëm dhe transformues nga të gjithë sektorët ekonomikë.
Sipas Ibrahimajt, për bizneset shqiptare qëndrueshmëria nuk është më një koncept abstrakt, por një domosdoshmëri operative që ndikon drejtpërdrejt në konkurrueshmëri, aftësinë eksportuese dhe përafrimin me standardet e Bashkimit Europian. Ajo theksoi se ky është një proces strategjik që synon të pozicionojë Shqipërinë në zinxhirët modernë të vlerës dhe prodhimit në Europë.
Ministrja nënvizoi se qëndrueshmëria dhe inovacioni duhet të jenë themeli mbi të cilin ndërtohet identiteti ekonomik i vendit, duke ruajtur dhe zhvilluar asetet më të çmuara të Shqipërisë: traditat, mjeshtërinë artizanale, prodhimet autentike, kreativitetin e të rinjve dhe kulturën kombëtare. “Janë këto vlera që duhet t’i mbrojmë dhe t’i kthejmë në avantazh konkurrues në tregjet globale”, u shpreh ajo.
Lexo edhe: Ministria e Turizmit, Kulturës dhe Sportit nis zbatimin e projektit ndërkufitar SEEDS!
Duke iu referuar procesit të integrimit europian, Ibrahimaj kujtoi se hapja e kapitujve të negociatave tregon se standardet e BE-së nuk janë më kërkesa formale, por detyrime konkrete për institucionet, bizneset dhe shoqërinë. Harmonizimi me rregulloret europiane, zbatimi rigoroz i legjislacionit dhe transformimi i proceseve të biznesit janë, sipas saj, elementët kyç të kësaj faze.
Ajo bëri të ditur se në tremujorin e parë të vitit 2026 do të prezantohet një program gjithëpërfshirës kombëtar për përgatitjen e biznesit shqiptar për integrimin në tregun e përbashkët europian. Programi do të përfshijë analiza sektoriale, modernizimin e proceseve prodhuese, forcimin e standardeve të cilësisë, dixhitalizimin dhe përgatitjen e të rinjve për kërkesat e ekonomisë moderne.
Ibrahimaj theksoi se vetëm përmes bashkëpunimit dhe një plani pune të qartë mund të shndërrohen sfidat aktuale në përparësi konkurruese për ekonominë shqiptare. Ajo vuri në dukje rëndësinë e koordinimit midis qeverisë, institucioneve financiare, biznesit, organizatave ndërkombëtare dhe akademisë, duke e cilësuar këtë partneritet si gurthemelin e suksesit drejt “Shqipërisë 2030”.
Konferenca “Business 2030 – A Sustainable Future Made in Albania” zhvillohet në formën e disa panelesh tematikë mbi sektorët kryesorë të ekonomisë, sfidat e financimit, transformimin e biznesit dhe rolin e të rinjve në zhvillimin e qëndrueshëm, me synimin për të nxitur një dialog të thelluar mbi tranzicionin e gjelbër, inovacionin dhe integrimin e vendit në ekonominë europiane të së ardhmes.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
