Alumil Albania dëshmon angazhimin e saj të vazhdueshëm ndaj arsimit të lartë dhe zhvillimit profesional të brezave të rinj. Ky angazhim pasqyron vizionin afatgjatë të kompanisë për ndërtimin e një ure të fortë ndërmjet dijes akademike dhe praktikës industriale, duke kontribuar drejtpërdrejt në përgatitjen e profesionistëve të së ardhmes.
Në kuadër të këtij bashkëpunimi, studentë nga degët e Inxhinierisë dhe Arkitekturës të Universitetit Epoka dhe Universitetit Metropolitan zhvilluan vizita studimore në showroom-in dhe ambientet e prodhimit të Alumil Albania, duke u njohur nga afër me proceset, teknologjinë dhe standardet e kompanisë.
Vizita u hap me një fjalim mirëseardhjeje nga Menaxheri i Përgjithshëm i Alumil Albania, Z. Georgios Batsakis, i cili përshëndeti studentët dhe shprehu vlerësimin e tij për interesin e treguar ndaj fushave të inxhinierisë dhe arkitekturës. Në fjalën e tij, Z. Batsakis theksoi rëndësinë e investimit tek brezat e rinj si një faktor kyç për zhvillimin afatgjatë të industrisë, duke nënvizuar se inovacioni, cilësia dhe qëndrueshmëria ndërtohen mbi dije, përkushtim dhe bashkëpunim. Ai i inkurajoi studentët ta shohin praktikën profesionale si një hap thelbësor në formimin e tyre dhe i ftoi, pse jo, që në të ardhmen të bëhen pjesë e familjes së madhe Alumil Albania.
Pas fjalimit të mirëseardhjes, vizita vijoi në showroom, ku studentët u njohën në mënyrë të detajuar me sistemet arkitektonike të Alumil. Arkitekti i kompanisë prezantoi karakteristikat teknike, performancën dhe aplikimet praktike të këtyre sistemeve në projekte bashkëkohore, duke ndihmuar studentët të kuptojnë më qartë ndërthurjen mes dizajnit, funksionalitetit dhe teknologjisë në ndërtimet moderne.
Turi vijoi në ambientet e fabrikës së Alumil Albania, ku studentët u shoqëruan nga menaxheri i prodhimit dhe ai i cilësisë, për të ndjekur nga afër çdo fazë të procesit industrial. Gjatë kësaj eksperience praktike, ata patën mundësinë të njihen në mënyrë të detajuar me të gjithë ciklin e përpunimit të aluminit, duke nisur nga lingotat, lënda e parë e ardhur nga Greqia, procesi i shkrirjes, formësimi përmes matricave që i japin jetë profileve, fazat e avancuara të lyerjes dhe bashkimit të tyre,akesesorët, paketimi e deri në përftimin te produktit final të gatshëm për treg.
Ky udhëtim në zemër të prodhimit u mundësoi studentëve të kuptojnë konkretisht se si dija teorike shndërrohet në produkte reale me standarde të certifikuara sipas standardeve të larta teknike dhe estetike. Kontakti i drejtpërdrejtë me teknologjinë, disiplinën industriale dhe procedurat rigoroze të kontrollit të cilësisë u ofroi atyre një panoramë të plotë mbi përkushtimin e Alumil Albania ndaj ekselencës, inovacionit dhe besueshmërisë.
Kjo përvojë i ndihmoi studentët të krijojnë një pasqyrë të plotë mbi funksionimin e një strukture industriale moderne, ku çdo departament është i ndërlidhur dhe kontribuon në ofrimin e produkteve cilësore dhe të besueshme për klientët.
Përmes këtyre iniciativave, Alumil Albania konfirmon angazhimin e saj për të kontribuar në formimin e profesionistëve të ardhshëm, duke krijuar sinergji të qëndrueshme mes universiteteve dhe industrisë dhe duke mbështetur zhvillimin afatgjatë të sektorit të ndërtimit dhe arkitekturës në Shqipëri.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
