Në moshën 27-vjeçare, Nabeel Khan arriti atë që shumë profesionistë e shohin si një ëndërr të largët: rriti të ardhurat nga 50 mijë në 432 mijë dollarë në vit brenda vetëm pesë vitesh në Amazon. Sot, ai ka lënë gjigantin e teknologjisë për të ndjekur pasionin e tij të hershëm, sipërmarrjen.
Fryma sipërmarrëse që në adoleshencë
Khan e kishte të qartë shumë herët se nuk do të ndiqte një rrugë “standarde”. Që në gjimnaz, ai bashkëthemeloi një kompani për përgatitje në provimet AP, duke punësuar 12 nxënës ekselentë dhe duke fituar rreth 5 mijë dollarë vetëm në muajin e parë.
Pas studimeve në Shkencë dhe Inxhinieri të Materialeve në Universitetin e Michigan-it, ai mendoi fillimisht për industrinë e pajisjeve sportive, por shpejt kuptoi se ndikimi më i madh do ta gjente në teknologji.
Amazon, trampolina drejt suksesit
Në vitin 2020, Khan nisi punë në Amazon si menaxher operacionesh me një pagë fillestare prej 50 mijë dollarësh në vit. Por për të, ky ishte vetëm fillimi.
I vendosur të rritej profesionalisht, ai kërkoi mentorë brenda dhe jashtë kompanisë, ndërtoi një plan të qartë zhvillimi dhe investoi orë të tëra pas pune për të mësuar aftësi të reja. Për gjashtë muaj, ai ndoqi një bootcamp programimi në Georgia Tech dhe u certifikua në Amazon Web Services (AWS).
Në punën e përditshme, ai gjeti mënyra kreative për të tejkaluar përshkrimin e rolit të tij, duke u përfshirë në projekte që do ta afronin me pozicionet e ardhshme. Një prej tyre ishte përmirësimi i sistemit të sigurisë në magazinë, një hap kyç për ndërtimin e profilit të tij si project manager.
Rezultatet erdhën shpejt:
-
2021: Promovohet si project manager – 66 mijë dollarë
-
2023: Kalon në rolin e product manager – 146 mijë dollarë
-
2025: Bëhet senior AI product manager – 432 mijë dollarë në vit, përfshirë pagën bazë dhe aksionet
Kursimi agresiv dhe pavarësia financiare
Gjatë kohës në Amazon, Khan arriti të kursejë rreth 80% të të ardhurave, duke ndërtuar një fond prej 666 mijë dollarësh në kursime dhe investime. Falë punës në distancë dhe udhëtimeve të shpeshta, ai shmangu kostot e larta të banimit, duke jetuar mes shtëpisë së prindërve në Georgia dhe asaj të partneres në Nju Jork.
Kjo disiplinë financiare i dha sigurinë për të marrë një vendim të madh: në korrik 2025, ai la Amazon dhe bashkëthemeloi SkillAxis, një kompani që trajnon dhe krijon AI product managers për kompani jo-teknologjike.
Jeta në Brooklyn dhe shpenzimet mujore
Sot, Khan jeton në Brooklyn me partneren e tij dhe mban shpenzimet rreth 5 mijë dollarë në muaj. Pjesa më e madhe shkon për qira, ushqim dhe transport, ndërsa ai aktualisht nuk kursen, duke u fokusuar plotësisht në rritjen e biznesit.
Që nga nëntori 2025, pasuria neto e tij arrin rreth 703 mijë dollarë, përfshirë investimet, llogaritë e pensionit, kriptomonedhat dhe disa ora luksoze, njëra prej tyre dhuratë për të atin, një ëndërr e realizuar familjare.
“Ji kreativ aty ku je”
Synimi i radhës për Khan është të arrijë 1 milion dollarë pasuri neto para moshës 30 vjeç. Por më shumë se shifrat, mesazhi i tij është i qartë:
“Ji kreativ me atë që ke në dispozicion në mjedisin ku ndodhesh. Nëse shkon përtej rolit tënd, investon te vetja dhe ndërton reputacion, përfitimi vjen vetë.”
Sot, ai punon rreth 80 orë në javë, por nuk e sheh këtë si sakrificë. Mes ndërtimit të biznesit dhe kohës me njerëzit e dashur, Nabeel Khan thotë se po jeton jetën që gjithmonë ka ëndërruar.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
