Importet e mallrave të akcizës shënuan rritje të ndjeshme në 6-mujorin e parë të vitit, në krahasim me të njëjtën periudhë të vitit të pandemisë 2020, si dhe krahasuar edhe me të njëjtën periudhë të vitit 2019.
Rritjen më të madhe e shënoi importi i karburanteve, që gjatë këtij viti theu rekordet historike. Të dhënat zyrtare të Ministrisë së Financave pohuan se gjatë periudhës janar – qershor 2021 u importuan 285 mijë tonë naftë, me rritje 21% në raport me vitin 2020 dhe 23% më shumë se edhe në vitin normal 2019.
Burimet nga tregu i lidhën importet e larta të naftës me mosfunksionimin e ARMO-s, por ndërkohë ky vit ka shënuar rekorde edhe në krahasim me vitet e mëparshme, kur ARMO nuk punonte dhe në vend po realizoheshin punimet në projektet e mëdha të gazsjellësit TAP dhe HEC-eve në lumin Devoll. Sipas analizës së Ministrisë së Financave, importet e larta të karburanteve ishin kontribuuesi kryesor në rritjen e të ardhurave buxhetore në këtë periudhë.
Të ardhurat doganore në janar-qershor 2021 u realizuan në vlerën 84.7 miliardë lekë, 16.5 miliardë lekë ose 24.3% më shumë se 6-mujori 2020, si dhe 4.5 miliardë lekë ose 5.6% më shumë se plani i të ardhurave doganore për 6-mujorin e vitit 2021.
Sipas Analizës së 60 grupmallrave, 50% të kontributit në totalin e të ardhurave doganore e zënë 5 produkte dhe përkatësisht, karburant importi 23.7%, cigaret 12.5%, metalet bazë dhe artikujt prej tyre 6.1%, automjetet e përdorura me 4.4%, plastika dhe artikujt 2.7%.
Ministria e Financave referoi se, ndikimin më të madh në rritje krahasuar me 6-mujorin e vitit 2020 e kanë dhënë të ardhurat nga importi i karburanteve, automjetet e përdorura, metalet bazë dhe artikujt prej tyre, cigaret, veshje dhe tekstile dhe materialet e ndërtimit, me efekt +9.6 miliardë lekë si rezultat i rritjes së sasisë së importuar dhe ndryshimit të çmimit.
Importi i cigareve shënoi rritje më të lehtë me vetëm 2% në raport me 6-mujorin e parë 2020, me një sasi të zhdoganuar prej 1,286 tonësh. Importet e cigareve kanë shënuar luhatje nga viti në vit gjatë dekadës të ndikuara nga akciza, kontrabanda dhe shtrëngimi i masave për pirjen e tij.
Importet e kafesë u rritën me 4% në 6-mujorin e parë, duke shënuar mbi 4100 tonë në sasi. Ato ishin gjithashtu më të larta se viti normal 2019 ku u importuan rreth 4 mijë tonë. Importet e birrës shënuan 18,930 hektolitra me një rritje 18% nga viti i pandemisë dhe 10% në raport me vitin normal 2019.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
