Shprehja “nuk kemi para” mund të duket një përgjigje e natyrshme kur fëmijët kërkojnë lodra, udhëtime apo gjëra që kalojnë buxhetin familjar, por sipas psikologut financiar Brad T. Klontz, ajo mund të dëmtojë mënyrën se si fëmijët ndërtojnë marrëdhënien e tyre me paranë.
Klontz shpjegon se kjo frazë shpesh nuk është plotësisht e vërtetë dhe krijon tek fëmijët ndjenjën e mungesës dhe pasigurisë financiare. Sipas tij, fëmijët që rriten duke dëgjuar vazhdimisht se “paratë nuk mjaftojnë”, rrezikojnë të zhvillojnë sjellje të gabuara financiare në të ardhmen, si shpenzime të tepruara apo përdorim i pakontrolluar i kredive.
Në vend të kësaj, eksperti këshillon prindërit të përdorin situatat kur fëmijët kërkojnë diçka të shtrenjtë si momente edukimi. Ai sugjeron që prindërit të shpjegojnë pse zgjedhin të mos shpenzojnë për një gjë të caktuar, duke folur hapur për prioritetet familjare, kursimet, shlyerjen e borxheve apo investimet për të ardhmen.
Sipas Klontz, një përgjigje më e shëndetshme është: “Ne mund ta bëjmë këtë, por po zgjedhim t’i shpenzojmë paratë për gjëra të tjera që janë më të rëndësishme për familjen tonë.” Kjo, sipas tij, i ndihmon fëmijët të kuptojnë se paratë nuk janë tabu, por një mjet që menaxhohet me zgjuarsi.
Psikologu thekson se fëmijët që rriten në familje ku flitet hapur për paranë kanë më shumë gjasa të bëhen të rritur të përgjegjshëm financiarisht. Diskutimi mbi kursimin, durimin dhe vendimet e menduara për shpenzimet u mëson atyre vlera që zgjasin gjithë jetën.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
