Diagnozimi i hershëm i sëmundjeve është thelbësor për trajtimin e suksesshëm të tyre. Kohët e fundit, Google ka zhvilluar një model inteligjence artificiale (AI) të quajtur Health Acoustic Representations (HeAR), i cili ka aftësinë të zbulojë sëmundje si tuberkulozi (TB) dhe sëmundja pulmonare obstruktive kronike (COPD) përmes analizës së tingujve të kollës.
HeAR është një model bio-akustik që përdor teknologjinë e avancuar për të analizuar modelet e tingujve dhe për të nxjerrë të dhëna të rëndësishme për shëndetin. Kjo teknologji është trajnuar me mbi 300 milionë pjesë audiosh të marra nga burime të ndryshme, përfshirë rreth 100 milionë tinguj kollash. Kjo e bën HeAR një nga sistemet më të sofistikuara për zbulimin e hershëm të sëmundjeve që lidhen me mushkëritë.
Një nga aplikimet kryesore të këtij sistemi është bashkëpunimi i Google me Salcit Technologies, një kompani indiane e kujdesit shëndetësor respirator, e cila ka krijuar një mjet të fuqizuar nga AI të quajtur Swaasa. Swaasa përdor analizën e tingujve të kollës për të vlerësuar shëndetin e mushkërive dhe do të integrojë HeAR për të përmirësuar aftësinë e tij në zbulimin e hershëm të TB. Sipas Sujay Kakarmath, menaxher produkti në Google Research, zbulimi i hershëm i tuberkulozit është jetik për të parandaluar përhapjen e tij dhe për të shmangur vonesat e diagnostikimit që shpesh rezultojnë fatale.
Lexo edhe: Pajisja e parë në botë që vendoset mbi qepallën e syrit. Ja cila është dobia e saj
Edhe pse është ende një mjet kërkimor që kërkon verifikim dhe konfirmim klinik për aplikimet e tij diagnostifikuese, HeAR ka demonstruar një potencial të jashtëzakonshëm dhe premtues. Në testet për të vlerësuar parametrat e funksionimit të mushkërive, HeAR tregoi një saktësi më të lartë se metodat e mëparshme të përdorura, duke hapur rrugën për mjetet e reja të depistimit të sëmundjeve pulmonare si COPD. Në të ardhmen, Google synon të përmirësojë më tej këtë sistem duke e bërë atë më të aksesueshëm për përdorim në pajisje të lëvizshme, si telefonat inteligjentë, për të krijuar një mjet të arritshëm për të gjithë.
Ky përparim i teknologjisë mund të sjellë një ndryshim të madh në mënyrën se si diagnostikohen sëmundjet pulmonare, duke i ofruar mjekëve dhe pacientëve mjete të reja për zbulimin dhe menaxhimin e tyre. Përveç kësaj, partneriteti i Google me organizata të tilla si Stop TB Partnership është një hap i rëndësishëm drejt arritjes së qëllimit për të eliminuar tuberkulozin deri në vitin 2030.
Ky inovacion mund të jetë një nga mjetet më të rëndësishme në luftën kundër sëmundjeve globale si tuberkulozi, duke sjellë shpresë për miliona njerëz në mbarë botën që përballen me mungesë të kujdesit të përballueshëm shëndetësor
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto