Brukseli është bërë sot pritësi i liderve të Ballkanit Perëndimor dhe udhëheqësve respektivë të Ukrainës dhe Moldavisë në një samit historik me synimin për të avancuar kandidaturat e tyre për anëtarësim në Bashkimin Evropian, në një moment vendimtar për balancat gjeopolitike të kontinentit.
Gjatë fjalës së tij, Presidenti i Këshillit Evropian, António Costa, e përshkroi zgjerimin e BE-së si “investimin më të mirë për të ardhmen e rajonit”, duke theksuar se ai mbetet një nga prioritetet kryesore të mandatit të tij, për të cilin është zotuar që nga dita 1.
“Që nga dita e parë në këtë detyrë, e kam konsideruar zgjerimin si një nga prioritetet e mia themelore. Konteksti aktual gjeopolitik e bën këtë proces edhe më urgjent dhe të domosdoshëm për Bashkimin Evropian,” tha Costa gjatë fjalimit të tij në Samitin e Zgjerimit të BE-së, organizuar nga Euronews.
Ai theksoi se “një Bashkim Evropian më i madh do të thotë një Evropë më e sigurt, më e fortë dhe më paqësore – si brenda kufijve të saj, ashtu edhe në arenën ndërkombëtare”. Sipas tij, zgjerimi është “investimi më i mençur që mund të bëhet sot për të ardhmen e përbashkët”.
Lexo edhe: Analiza/ Si po përmbushin vendet kandidate kërkesat teknologjike për anëtarësim në BE
Costa u shpreh optimist për ecurinë e disa vendeve të Ballkanit, duke përmendur posaçërisht Malin e Zi dhe Shqipërinë. “Besoj se Mali i Zi mund të bëhet vendi i 28-të i BE-së në vitin 2028,” tha ai, duke shtuar se “përparimi i këtij vendi është më i dukshmi, dhe objektivi për të përmbyllur negociatat deri në fund të vitit 2026 është i arritshëm nëse vazhdojnë me ritmin aktual të reformave.”
Në të njëjtën kohë, Presidenti i Këshillit Evropian vlerësoi progresin e dukshëm të Shqipërisë në rrugën e saj drejt anëtarësimit në BE.
Ky samit përkon me prezantimin nga Komisioni Evropian të paketës së zgjerimit për vitin 2025, një vlerësim vjetor i progresit të vendeve kandidate që do të përcaktojë tonin për vitin e ardhshëm.
Sa i takon Shqipërisë, ky raport vlerëson se vendi ka ruajtur përkushtimin politik ndaj integrimit në BE dhe ka avancuar negociatat në pesë nga gjashtë klasterët. Shqipëria ka bërë përparim në reformën e drejtësisë, me përfundimin e fazës së parë të procesit të rivlerësimit të gjyqtarëve dhe prokurorëve, si dhe me rritjen e efikasitetit të SPAK në luftën kundër korrupsionit dhe krimit të organizuar. Megjithatë, mbeten sfida serioze në pavarësinë e gjyqësorit, zbatimin e reformave administrative dhe garantimin e të drejtave themelore, përfshirë lirinë e medias dhe të pronës. Ekonomia shqiptare ka ruajtur ritme të qëndrueshme rritjeje dhe ka përmirësuar stabilitetin fiskal, por përballet ende me boshllëqe strukturore, sidomos në tregun e punës dhe arsimin profesional. Komisioni kërkon përshpejtimin e reformave në drejtësi, administratë dhe sundimin e ligjit për të mbështetur procesin e anëtarësimit.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
