Koordinatorja e festivalit, Klodjana Serraj, shprehet se interesi i shkodranëve për të ndjekur këto netë ka qenë jashtëzakonisht i lartë. Ajo thekson se përgjatë netëve të festivalit do të ofrohet transport falas për qytetarët, duke bërë kështu më të lehtë pjesëmarrjen për të gjithë.
“Za Fest-in e duan të gjitha moshat. Deri në moshën 13 vjeç është falas dhe mbi moshën 65 vjeç është falas, gjithashtu edhe transporti është falas,” theksoi Serraj.
Në këtë edicion të tetë të “Za Fest”, shumë artistë të njohur do të jenë të ftuar për të performuar për publikun e pranishëm. Me kalimin e viteve, ky festival është shndërruar në një destinacion të rëndësishëm turistik, duke tërhequr vizitorë nga e gjithë bota. Vendndodhja strategjike dhe atmosferat e veçanta që krijohen kanë kontribuar në shndërrimin e “Za Fest” në një festë të vërtetë të trashëgimisë kulturore të Shkodrës.
Mistikja e kalasë “Rozafa”, e ndërthurur me muzikën dhe atmosferën e veçantë të festivalit, pritet t’i bëjë këto tre netë të parezistueshme për publikun shkodran dhe turistë nga e gjithë bota. Për tre netë, qyteti i Shkodrës do të pulsojë me energjinë e “Za Fest”, duke ofruar një përvojë të paharrueshme për të gjithë ata që do të kenë fatin të jenë pjesë e kësaj ngjarjeje magjepsëse.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto