Ligji për rezervat e sigurisë së naftës, Sekretariati i tërheq vëmendjen Shqipërisë - Business Magazine Albania

Ligji për rezervat e sigurisë së naftës, Sekretariati i tërheq vëmendjen Shqipërisë

naftës

Sekretariati i Komunitetit të Energjisë i ka tërhequr vëmendjen Shqipërisë sa u takon rezervave të sigurisë së naftës, ligj i cili ka mbetur pa u miratuar prej të paktën katër vitesh.

Në një dokument përmbledhës mbi ecurinë e sektorit të hidrokarbureve, Sekretariati sjell në vëmendje ecurinë e aktivitetit të nxjerrjes, ku janë disa kontrata aktive, si dhe krijimin e rezervës së sigurisë. Sa i takon së parës, dokumenti nënvizon se kompani të ndryshme kanë pasur qasje të ndryshme në vitin e pandemisë. Kështu Shell Upstream Albania ka pasur aktivitet të limituar në Blloqet 2 , 3 dhe 4.

Kompania italiane Eni, e cila nënshkroi një marrëveshje hidrokarbure për Bllokun e Dumresë, nuk zhvilloi ndonjë aktivitet të eksplorimit.

Bankers Petroleum, pavarësisht situatës së pandemisë dhe uljes së theksuar të çmimeve të naftës bruto, arriti të prodhojë 674.2 tonë, me rënie 44% krahasuar me 2019. Konsumi ra gjithashtu me 20%. Sekretariati përpos gjithë zhvillimeve, në bilancin e sektorit nënvizon edhe faktin që Shqipëria nuk ka ndonjë tubacion të dedikuar për këtë sektor.

Rezervat e sigurisë të naftës

Sekretariati thekson se sistemi aktual i emergjencës i rezervave të naftës në Shqipëri i është ngarkuar industrisë së naftës, e cila duhet të ketë të ndarë sasi të nevojshme sa konsumi mesatar i të paktën 90 ditëve.

“Për të katërtin vit radhazi, Shqipëria nuk miratoi projektligjin për ngritjen, mirëmbajtjen dhe menaxhimin e rezervave minimale të sigurisë të naftës bruto dhe produkteve të naftës Projektligji vazhdoi të diskutohej nga palët e interesuara, por asnjë progres nuk u arrit gjatë krahasimit të dy raportimeve të fundit. Sistemi aktual i mbajtjes së stokut të naftës nuk është në përputhje me Direktivën 2009/119/EC” nënvizon sekretariati.

Lexoni: Fuçia e naftës mund të arrijë 100$. Kjo do të sjellë uraganin e ri makroekonomik në botë thonë ekspertët  

Ligji për rezervat e sigurisë

Qeveria shqiptare në vitin 2019 hodhi për konsultim një projektligj që parashikonte pjesën e rezervave të sigurisë dhe ndryshimin e regjimit në raport me atë që aplikohet sot. Sipas shpjegimit të bërë në atë kohë në projektligj, këto rezerva janë sasitë e rezervave të naftës dhe nënprodukteve të saj të krijuara, për të siguruar një nivel të lartë të sigurisë së furnizimit të Republikës së Shqipërisë dhe për të përmbushur detyrimet e marrëveshjeve përkatëse ndërkombëtare. Ato mund të përdoren në kohë krizash prodhimi apo lufte.

I njëjti draft parashikonte se krijimi dhe mbajtja e rezervës së sigurisë do të ndahet mes industrisë dhe një enti publik. Ky i fundit do të ketë edhe shumicën e kësaj rezerve të paktën 60 ditë mesatare shitjeje, kurse kompanitë dhe rafineritë 30 ditë mesatare shitjeje. Agjencia Shtetërore e Rezervave të Sigurisë të Naftës është institucioni i ri që do të krijohej në varësi të Ministrisë së Infrastrukturës dhe Energjisë. Kjo e fundit do të funksionojë me vetëfinancim përmes një tarife që do të mblidhet në çdo një litër karburant tek rafineritë dhe shoqëritë e shumicës.

Pikërisht tarifa për agjencinë dhe mënyra si ishte konceptuar mbajtja e rezervës u kundërshtuan fort në atë kohë nga industria pasi sipas tyre rriste kostot e për rrjedhojë kjo do të përçohej edhe tek çmimi final.

/monitor

Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.

Mund të kontribuoni KETU. Falemnderit.

Must watch
Business Mag Nr. #30 - Nëntor 2022
Shiko më shumë
Na ndiqni në rrjetet sociale
0