Një tjetër legjendë e teknologjisë po mbyll perdet. Pas më shumë se 20 vitesh duke lidhur botën, Skype po përgatitet për lamtumirën e fundit. Microsoft ka konfirmuar se më 5 maj 2025, shërbimi që dikur revolucionarizoi thirrjet në internet do të shuhet përgjithmonë, duke i hapur rrugën një epoke të re të komunikimit të fokusuar te Teams.
Lajmi nuk është një surprizë për ata që kanë ndjekur rënien graduale të Skype. Dikur sinonim i komunikimit online, platforma ka luftuar për të mbijetuar në një treg të dominuar nga Zoom, Slack dhe platformat e reja të mesazheve. Në vend që të investojë në një ringjallje të vështirë, Microsoft ka zgjedhur të përqendrojë të gjitha burimet te Teams, mjeti i saj kryesor për komunikimin profesional dhe bashkëpunimin në distancë.
Lexo gjithashtu: Bashkëthemeluesi i Google ka pritshmëri të çuditshme se sa duhet të punojë një punonjës i AI
Nga një revolucion teknologjik në një relike dixhitale
Në vitin 2003, Skype solli një epokë të re në komunikim, duke mundësuar thirrje me zë dhe video falas, në një kohë kur telefonatat ndërkombëtare ishin ende një luks i kushtueshëm. Deri në fund të viteve 2000, ishte gjithkund, nga bisedat familjare deri te intervistat televizive. Në 2011, Microsoft e bleu për 8.5 miliardë dollarë, duke i dalë përpara Google dhe Facebook në garën për ta marrë nën kontroll.
Por triumfi ishte jetëshkurtër. Skype u mbeti besnik kompjuterëve, ndërsa bota kalonte në smartfonë dhe aplikacione të shpejta e intuitive. Kur Zoom dhe Slack dolën në skenë me një teknologji më të më të besueshme, Skype nuk mundi të mbante ritmin.
Pandemia, mundësia e fundit e humbur
Në kohën kur pandemia globale ktheu videokonferencat në një nevojë bazike, shumë prisnin që Skype të rikthehej si lojtari kryesor. Por Microsoft kishte tashmë një tjetër plan, Teams. Në vend që të investonte për të shpëtuar Skype, kompania u fokusua plotësisht në zhvillimin e platformës së saj për bizneset. Rezultati? Teams sot ka mbi 320 milionë përdorues aktivë në muaj, ndërsa Skype, në vitin 2020, kishte rënë në vetëm 23 milionë.
Lexo gjithashtu: Instagram dëshiron të konkurrojë TikTok-un me aplikacionin rival Reels
Fund një epoke, por pa pasoja të mëdha
Për ata që ende përdorin Skype, Microsoft siguron një tranzicion të lehtë. Të gjitha kontaktet dhe mesazhet do të transferohen automatikisht në Teams, duke ofruar një kalim pa probleme. Gjithashtu, kompania thekson se nuk do të ketë shkurtim të vendeve të punës nga ky ndryshim.
Por ky vendim nuk bën gjë tjetër veçse e shton Skype-n në listën e gjatë të projekteve të Microsoft që përfunduan në histori, së bashku me Internet Explorer dhe Windows Phone.
Pra, nëse ai tingulli i veçantë i thirrjes së Skype ju sjell ende nostalgji, ndoshta është koha për një telefonatë të fundit, përpara se të “largohet” përgjithmonë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
