Në një sallë të mbushur me energji pozitive dhe dëshirë për të mësuar, BusinessMag Albania hapi dje serinë e eventeve të saj për të festuar 10-vjetorin e themelimit. Seminari i parë me titull “Menaxhimi i Biznesit në Kohë Sfiduese” solli së bashku mbi 300 profesionistë nga fusha e biznesit dhe sipërmarrjes, të cilët u mblodhën për të përfituar nga përvoja dhe njohuritë e njërit prej sipërmarrësve dhe mentorëve më të njohur në Shqipëri, z.Vasil Naçi.
Eventi u organizua në një atmosferë dinamike, ku pjesëmarrësit patën mundësinë të ndajnë përvojat e tyre dhe të mësojnë nga strategjitë më të fundit për menaxhimin e krizave dhe rritjen e suksesshme të bizneseve. Ky ishte vetëm eventi i parë i një serie aktivitetesh që BusinessMag Albania do të zhvillojë gjatë këtij viti për të festuar një dekadë të tërë dedikuar promovimit të inovacionit, edukimit dhe sipërmarrjes.
Vasil Naçi, me karizmën dhe përvojën e tij të pasur, prezantoi konceptin e “7 fuqive bazë për suksesin në biznes”. Sipas tij, për të ndërtuar një biznes të qëndrueshëm dhe të suksesshëm është thelbësore të kemi qartësi dhe drejtim. Ky është themeli mbi të cilin duhet ndërtuar gjithçka tjetër. Ai e ndau suksesin në biznes në shtatë komponentë kryesorë: Inovacioni dhe transformimi dixhital, marketingu dhe brandet, shitja dhe mjetet, financa dhe analizat, operimi dhe sistemet. Të gjitha këto elemente duhet të bashkëveprojnë në harmoni për të krijuar një kulturë që nxit klientë besnikë. Pjesëmarrësit patën mundësinë të mësojnë se si të përdorin këto shtylla për të ndërtuar struktura të forta organizative dhe për të arritur sukses afatgjatë.
Një tjetër aspekt i rëndësishëm që Vasil Naçi trajtoi ishte menaxhimi i krizave, një temë gjithmonë aktuale për bizneset, veçanërisht në kohë të pasigurta. Ai theksoi se përballja me krizat kërkon aftësinë e parashikimit, zakone të përgatitjes, strategji të qarta për dalje dhe një mendësi të orientuar drejt mundësive. Me qasje praktike dhe të strukturuar, z.Naçi demonstroi se ndryshimet në ekonomi, teknologji, treg dhe konkurrencë janë të pashmangshme, por me përgatitje të duhur, mund të përballohen me sukses.
Gjatë prezantimit, ai përmendi 10 nxitësit kryesorë të krizave në biznes, ku përfshihen: fatkeqësitë natyrore, ndryshimet në qeverisje, krizat ekonomike, konkurrenca, menaxhimi i dobët i ekipeve, mungesa e likuiditetit, ndryshimet teknologjike, ndryshimet në treg, varësia nga një burim i vetëm dhe ndryshimet në fazat e jetës së një kompanie. “Nuk ka zgjidhje magjike për krizat. Përgatituni paraprakisht dhe mos prisni që kriza të ndodhë për t’i adresuar problemet,” theksoi ai.
Lexo edhe:“Mjeshtëro Biznesin 2025”: Event-Trajnim nga Vasil Naçi!
Ky event u konsiderua një sukses i vërtetë jo vetëm për shkak të pjesëmarrjes së lartë, por edhe për shkak të përmbajtjes së pasur dhe praktike që u ofrua. BusinessMag Albania, me këtë seminar, po dëshmon se është një platformë e rëndësishme për promovimin e ideve inovative dhe rritjen profesionale të komunitetit të biznesit në Shqipëri. Për më tepër, ky seminar është vetëm fillimi i një serie eventesh që do të zhvillohen gjatë vitit, duke u bërë pjesë e një kalendari plot aktivitete të dedikuara për të festuar 10-vjetorin e BusinessMag Albania. Me tematika të ndryshme dhe folës të njohur, këto evente synojnë të sjellin ide të reja, mundësi për rrjetëzim dhe përvoja unike për sipërmarrësit dhe profesionistët nga fusha të ndryshme.
Ky ishte vetëm fillimi. Ajo që pritet është një vit i mbushur me risi, angazhime dhe sukses.
Nga Eni Muça
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
