Ministria e Bujqësisë dhe Zhvillimit Rural (MBZHR) po bashkëpunon ngushtë me Agjencinë Amerikane për Zhvillim Ndërkombëtar (USAID) për krijimin e hartave digjitale të tokave bujqësore në Shqipëri. Ky bashkëpunim ka për qëllim modernizimin dhe përmirësimin e infrastrukturës bujqësore të vendit, duke e përgatitur atë për integrimin në Bashkimin Evropian (BE).
Sipas MBZHR-së, hartat e tokës, kadastra e tokës dhe sistemi final i rrjetit për të dhënat e kontabilitetit nga ferma (FADN) janë elementë kyç për këtë proces. Këto sisteme kërkojnë jo vetëm fonde buxhetore të vendosura në dispozicion nga pushteti qendror, por gjithashtu kërkojnë një ekspertizë të thelluar dhe mbështetje nga partnerët strategjikë. Pikërisht për këtë arsye, MBZHR ka filluar punën me mbështetjen e BE-së dhe USAID-it për të vendosur një plan konkret dhe të rëndësishëm për ndërtimin e këtyre hartave. Ky plan synon të sigurojë një ekspertizë të avancuar për të mbështetur krijimin e hartave digjitale dhe të gjithë informacionit të nevojshëm për integrimin në BE.
Në kontekstin e digjitalizimit, MBZHR raporton se shumë procese dhe shërbime publike janë digjitalizuar, çka ka rezultuar në uljen e kostove dhe kursimin e kohës për qytetarët dhe fermerët. Aktualisht, janë 19 shërbime bujqësore që ofrohen online, dhe brenda këtij viti, MBZHR planifikon të shtojë edhe 25 shërbime të tjera në këtë sektor. Këto shërbime të reja do të jenë të disponueshme online për operatorët e sektorit rural, duke lehtësuar aksesin në informacion dhe shërbime.
MBZHR thekson se këto nisma janë pjesë e përmbushjes së kërkesave të procesit të integrimit në BE. Të gjitha projektet e nisura janë në mbështetje të një sistemi më të përparuar digjital, i cili është i nevojshëm për të përmirësuar efikasitetin dhe transparencën në sektorin e bujqësisë. Këto përpjekje synojnë të krijojnë një bazë të fortë për zhvillimin e qëndrueshëm rural dhe përgatitjen e Shqipërisë për të qenë pjesë e BE-së, duke përmirësuar cilësinë e jetës për fermerët dhe banorët ruralë.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
