Rritja e çmimeve ka arritur një nga nivelet më të larta në muajin dhjetor duek shkuar ne 3.7%. Qytetarët çdo ditë po shpenzojnë më shumë për produktet e tyre të përditshmërisë, apo siç cilësohen produktet e shportës.
E para është buka që ka shkuar nga 80 në 90 lekë, më pas vaji për gatim ka pësuar një rritje gati me 30 lekë,së bashku me orizin dhe sheqerin.
Nga e gjithë kategoria e ushqimeve rritjen më të lartë e kanë pësuar frutat dhe perimet. Ndërkohë edhe transporti ka një nga rritjet më të forta, me çmimet e karburanteve të rritura me nga 50 lekë që pas pandemisë.
Nëse një familje me një mesatare prej katër personash harxhonte rreth 83 400 lekë në muaj sipas INSTAT në 2020-ën, shpenzimet janë shtuar edhe me minimalisht 5 000 lekë , duke e çuar totalin në 88 000 mijë lekë në muaj.
Paga mesatare në Shqipëri është rreth 56 400 lekë, ndërsa nëse një familje ka dy të punësuar, atëherë ata nuk kalojnë 112 400 lekë, duke i lënë atyre shumë pak kursime mënjanë dhe duke e vënë shtresën e mesme të shoqërisë nën një presion të fortë me pandeminë që ende vazhdon.
Guvernatori Gent Sejko është shprehur se çmimet e larta do na shoqërojnë gjithë vitin dhe në këto kushte përkeqësohen disa tregues në ekonomi.
I pari është ai i rrezikut që për të qenë i varfër, ku sipas statistikave 1 në 3 familje me fëmijë në varësi vlerësoheshin të rrezikuara nga varfëria në 2020-ën, ndërsa një personi që i duheshin 18 600 lekë për të mbijetuar tashmë do t’i duhen rreth 2 000 lekë më shumë, teksa rritja e çmimeve zhvlerëson ndihmën dhe asistencat sociale.
Një tjetër problem që rritja e çmimeve do shkaktojë është për pensionistët. ISSH ka parashikuar të indeksojë pensionet e tyre deri në kufirin 3%, por duke qenë se inflacioni pritet më lartë se kjo normë, pensionet e tyre mund të vijnë me ulje këtë vit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
