Kosova me pullë postare për nder të mjekëve që kanë humbur jetën në përballje me COVID-19

Kosova ka promovuar pullën postare “Heronjët Mantelbardhë” për nder të njohjes së kontributit të të gjithë personelit shëndetësor që kanë humbur jetën në ballafaqimin me COVID-19, raporton Anadolu Ageny (AA). Ministri në detyrë i Shëndetësisë, Armend Zemaj, i cili takoi përfaqësuesit e Postës së Kosovës dhe përfaqësues të personelit mjekësor të Shërbimit Spitalor Klinik Universitar të Kosovës (ShSKUK), tha se kërkesa për një pullë postare të tillë ka qenë e Ministrisë së Shëndetësisë, në mënyrë që sadopak t’u njihet kontributi personelit shëndetësor që humbën jetën në përballje me pandeminë.

“Besoj dhe shpresoj se kjo njohje dhe kjo ecje e pullës postare do të tregojë mundin, sakrificën dhe përkushtimin e ‘mantelbardhëve’ të cilët kanë bërë dhe po bëjnë të pamundurën në trajtimin e pacientëve me COVID-19”, theksoi Zemaj, i cili për nder të të gjithë profesionistëve shëndetësorë u ka ndarë nga një pllakë të kësaj pulle postare disa prej mjekëve të pranishëm në takim.

Drejtori i Postës së Kosovës, Xhevdet Smakiqi tha se përmes kësaj pulle postare po tentohet sensibilizimi i qytetarëve për kujdesin nga pandemia. Smakiqi tha se në situatën në të cilën tani gjendet shoqëria, barra ka rënë mbi supet e mantelbardhëve dhe për këtë ata meritojnë emërtimin “heronj”.

“Kam nderin dhe kënaqësinë që sot të prezantojmë emisionin e ri të pullave postare me titull Heronjtë Mantelbardhë të cilën Posta e Kosovës e ka vënë në qarkullim. Pulla postare si simbol i shtetësisë përpos rolit që ka në shërbim postar, kryen edhe rolin madhor të prezantimit të vlerave kulturore, historike, të arriturave në art dhe shkencë në vendin tonë”, theksoi ai.

Infektologu Sali Ahmeti dedikimin e pullave postare për personelin shëndetësor e vlerësoi si një përkrahje dhe mirënjohje për punën e tyre. Ahmeti tha se të gjithë mantelbardhët e të gjitha niveleve shëndetësore dhe spitaleve kanë bërë një punë të vetëmohueshme gjatë pandemisë, ku në moment të caktuara është kërkuar një mbingarkesë nga e cila disa kanë përfunduar edhe me humbje jete.

“Gjatë kësaj pandemie kemi mësuar shumë gjëra, në mesin e tyre mendoj se është ajo që edhe në situata shumë të vështira, kur bëhet një punë ekipore, gjithmonë rezultatet nuk do të mungojnë. Ne ‘mantelbardhët’ përkundër rrethanave të vështira në përballje me pandeminë, kemi pasur rrethana lehtësuese për faktin se kemi punuar si ekip”, theksoi Ahmeti. Në Kosovë që nga fillimi i përhapjes së koronavirusit të ri (COVID-19) deri më tani kanë vdekur më shumë se 20 mjekë dhe infermierë, ndërsa gjatë kësaj kohe, më shumë se 1 mijë janë infektuar.

Must watch
Business Mag Nr. #24 - Tetor 2020

Numri 24 i revistës Businessmag.al sjell një panoramë të zhvillimeve, përshtatjeve dhe ecurisë në sektorë të ndryshëm të ekonomisë. Në të njëjtën kohë, shohim zhvillime relativisht të kënaqshme.  Organizime të reja si Dhoma Ekonomike e Gruas, duket si një shpresë për më shumë zë, lobim dhe mbështetje për gratë sipërmarrëse dhe sipërmarrjet e reja.

Gjatë kësaj periudhe angazhime si programi “Ringrihu më i fortë”, ishin një lloj kundërpërgjigje ndaj dëmeve ekonomike që po shkakton pandemia.

Influencerat vijojnë të rrisin hapësirat e tyre dhe janë bërë një instrument i rëndësishëm marketimi. Në brendësi të revistës do të gjeni renditjen e top 100 influencerave më të mëdhenj në vend.

Gjatë kësaj vere ndërkohë, vetë Businessmag pati një fushatë të suksesshme të promovimit të turizmit shqiptar. Qindra të rinj u angazhuan të dërgojnë foto dhe përshkrimet e vendeve të ndryshme të Shqipërisë.

Shiko më shumë
Na ndiqni në rrjetet sociale