Nisma e studentit Sovran Hoti, ka rezultuar e suksesshme pasi me vendosjen e kufijve të Kosovës në hartat e Apple, tashmë është arritur qëllimi që edhe platforma e transmetimit të filmave, Netflix, ta bëjë Kosovën pjesë të listës së saj. Historia e kësaj nisme filloi kur studenti Hoti i cili është përdorues i rregullt i Netflix-it, vuri re se vendndodhja e Kosovës i figuronte si Serbi dhe kështu bëri kërkime rreth kësaj çështje.
Më vonë çështja u zmadhua dhe mbërriti në vëmendjen e vëmendjen e Netflix-it, në muajin shkurt të këtij viti me qëllim që Republika e Kosovës të njihej si shtet në Netflix. Peticioni pati jehonë dhe u përkrah edhe nga artistë, njerëz publikë dhe jo vetëm.
Pasi u mblodhën 37 mijë nënshkrime për dy muaj, Netflix-i e dëgjoi thirrjen e kosovarëve dhe futi Kosovën në listën e shteteve në këtë platformë. Ka qenë po vetë Sovran Hoti, i cili ka njoftuar sot për këtë arritje duke treguar se Netflix ka shtuar Kosovën në listën e shteteve me kodin telefonik +383 në platformën e tyre.
Ai tha se është në pritje që e njëjta të ndodhë edhe me vendndodhjen e përdoruesve kosovarë. Hoti falënderoi të gjithë ata që kanë kontribuar në këtë arritje dinjitoze dhe simbolikë e bashkimit.
“Nuk u deshtën 200 mijë, me 37 mijë nënshkrime dhe rreth 2 muaj, Netflix e dëgjoi thirrjen tonë. Netflix ka shtuar Kosovën në listën e shteteve me kodin telefonik +383 në platformën e tyre. Presim t ‘pasoj e njëjta edhe për vendndodhjen e përdoruesve kosovarë. Faleminderit të gjithëve që më keni mbështetur në këtë arritje simbolike, por të dinjitetshme!”, ka shkruar ai.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
