Grupe llogarish të rreme të koordinuara nga AI(swarm) po arrijnë sot të imitojnë sjelljen njerëzore aq mirë, sa të manipulojnë bisedat politike online dhe potencialisht të ndikojnë edhe në zgjedhje.
Ato nuk shfaqen në mitingje dhe nuk hedhin vota, por mund të ndikojnë realisht në funksionimin e demokracisë. Studiuesit po shprehin gjithnjë e më shumë shqetësim për “persona” të kontrolluar nga inteligjenca artificiale, të cilët duken dhe tingëllojnë si përdorues të zakonshëm, ndërsa në heshtje ndikojnë atë që njerëzit shohin, shpërndajnë dhe besojnë në rrjet.
Një raport i publikuar në revistën shkencore Science paralajmëron se grupe të koordinuara personazhesh artificiale mund të depërtojnë në komunitete reale online, të ndërtojnë besueshmëri me kalimin e kohës dhe të drejtojnë diskutimet politike në mënyrë të synuar, me shpejtësi makinerie. Ndryshimi kryesor nga botnet-et e mëparshme është bashkëpunimi. Nuk kemi më vetëm postime masive spam, por rrjete llogarish që koordinohen vazhdimisht, mësojnë çfarë funksionon dhe mbajnë të njëjtën narrativë përmes mijëra profileve, edhe kur disa prej tyre mbyllen ose zëvendësohen.
Si funksionojnë rrjetet e “personave” me AI
Modelet e reja të inteligjencës artificiale, të kombinuara me sisteme multi-agent, e bëjnë të mundur që një operator i vetëm të drejtojë një “kast” të tërë zërash artificialë, të cilët duken lokalë dhe autentikë. Çdo personazh mund të flasë me stil paksa ndryshe, të njohë normat e komunitetit dhe të reagojë shpejt ndaj kritikave, duke e bërë shumë më të vështirë dallimin mes diskutimit real dhe manipulimit të orkestruar.
Këto “swarm-e” mund të testojnë me shpejtësi mijëra mesazhe dhe më pas të përforcojnë versionet që ndikojnë më shumë tek mendimet e njerëzve. Kur përdoret në mënyrë të sofistikuar, kjo teknikë mund të krijojë ndjesinë se “të gjithë po e thonë këtë”, edhe pse në realitet ky konsensus është i ndërtuar artificialisht.
Lexo edhe: “Vrasja” e The Washington Post!
Shenjat e para: deepfake dhe media sintetike
Edhe pse rrjetet e plota të personave me AI nuk janë ende të përhapura gjerësisht, ekspertët thonë se shenjat paralajmëruese tashmë ekzistojnë. Shkencëtari i kompjuterikës në UBC, Dr. Kevin Leyton-Brown, përmend videot deepfake dhe mediat e rreme të gjeneruara nga AI, të cilat kanë ndikuar në debate të lidhura me zgjedhjet në SHBA, Tajvan, Indonezi dhe Indi.
Ndërkohë, organizata monitoruese raportojnë se rrjete pro-Kremlin po përmbytin internetin me përmbajtje të qëllimshme për të “ndotur” të dhënat mbi të cilat trajnohen modelet e ardhshme të AI. Kjo ngre shqetësime serioze për mënyrën se si inteligjenca artificiale mund të formësohet në të ardhmen nga dezinformimi.
Çfarë do të thotë kjo për zgjedhjet dhe besimin publik
Sipas Dr. Leyton-Brown, rrjetet e koordinuara me AI mund të ndryshojnë balancat e pushtetit në demokraci. “Nuk duhet të mendojmë se shoqëria do të mbetet e pandryshuar ndërsa këto sisteme zhvillohen. Një pasojë e mundshme është rënia e besimit ndaj zërave të panjohur në rrjete sociale, gjë që mund të forcojë figurat e njohura dhe të vështirësojë daljen në pah të zërave grassroots.”
Studiuesit paralajmërojnë se zgjedhjet e ardhshme mund të shërbejnë si testi i parë real për këtë teknologji, duke ngritur pyetjen urgjente: a do të arrijmë t’i identifikojmë dhe ndalojmë këto fushata të koordinuara ndikimi, përpara se të jetë vonë?
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
