Shumëkush e njeh si Blerina e Rafting, ndërsa të tjerë si juriste dhe eksperte në fushën e turizmit. Por këto ditë ajo ka marrë një lajm, i cili i përket jo vetëm asaj, por edhe Shqipërisë!
Programi prestigjioz i Departamentit të Shteteve të Bashkuara të Amerikës YTILI (Young Transatlantic Innovation Leaders Initiative), përzgjedh çdo vit vetëm 100 finalistë mes qindra aplikimeve të sipërmarrësve të rinj europianë. Ky program praktike profesionale 1-vjeçare, mundësuar nga Fondi Gjerman Marshall, i bën finalistët pjesë e një organizate/biznesi apo institucioni në SHBA ku të mund të zhvillojnë aftësi të reja profesionale, të hulumtojnë në fusha të ndryshme të kërkimit shkencor, të krijojnë ide të reja biznesi dhe lidershipi dhe të forcojë bashkëpunimin transatlantik mbi sfidat rajonale, kombëtare dhe globale në frymën e Planit Marshall. Për vitin 2017, mes mbi 650 aplikimeve, fituesja nga Shqipëria është shpallur Blerina Ago administratorja e “Albanian Adventure Resort”.
Si rezultat i 15 viteve punë, Blerina Ago është duke zhvilluar sipërmarrjen më inovative dhe ide të gjelbërta në fushën e turizmit, pozicionuar në Skrapar “Albanian Adventure Resort” sha.
“Albanian Adventure Resort” ka si qëllim ndryshimin e jetës se komunitetit përmes aktiviteteve sportive në natyrë dhe arsimit profesional në fushën e turizmit aventurë dhe mikpritjes.
“AAR” shtrihet në hapësirën e një ish-reparti ushtarak të amortizuar, mes natyrës së paprekur dhe fare pranë kanioneve të Osumit. Lokacioni i propozuar ofron një gamë mundësish për mbi 15 aktivitete aventurë, duke përfshirë rafting në afërsi të kanioneve të Osumit, hiking, kajak, hidrospid, kalërim, çiklizëm malor, kaçavjerrje dhe sporte të tjera të shumta në natyrë.
Gjenerimi i të ardhurave përmes aktiviteteve komerciale do të ndihmojë për të rritur standardet e të gjitha sporteve aventurë në Shqipëri dhe do të rrisin profilin e Shqipërisë si një destinacion i turizmit aventurë.
burimi: Top-Channel
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
