Shtylla themelore e sipërmarrjes është inovacioni dhe sidomos inovacioni që në gjenezë. Për ta arritur këtë Junior Achievement of Albania prej vitesh kujdeset për edukimin dhe nxitjen e shpirtit sipërmarrës te të rinjtë, implementimin e mendësisë së duhur, duke filluar që nga gjimnazi dhe krijimi i një kulture menaxhuese, bashkëvepruese dhe inovatore.
Ende pa mbaruar studimet në gjimnazet përkatëse nxënës nga të gjitha shkollat e mesme në rrethet e Shqipërisë kanë mundësinë të angazhohen në ideimin, krijimin, ngritjen dhe implementimin e një biznesi të mirëfilltë dhe madje ta kthejnë në diçka fitimprurëse. Në panairin, ku u finalizuan punët e nxënëse, morën pjesë 24 kompani nga të 4 anët e Shqipërisë. Studentë entuziastë tregonin për idetë e tyre, produktet dhe shërbimet që ofronin, në pritje të klientelës së parë.
Fituesit e çmimit “Shoqëria Sipërmarrëse më e mirë e vitit 2022” u shpall kompania Nexus me produktin e saj Lumos, një projektor i posaçëm nga ku mund të shohësh filma vetëm me ndihmën e celularit.
Duke filluar nga biznese sociale, deri te platforma teknologjike, pajisje inovatore dhe produkte artistike, më poshtë gjeni idetë e nxënësve shqiptar:
Puff Pets – Një zgjidhje për të gjitha nënat apo prindërit e rinj. Puff Pets kanë ideuar kafshë prej pelushi me një mekanizëm, i cili regjistron përralla për të vegjëlit me zërin e nënës së tyre.
Zanat e Malit – Produkte të bëra me dorë si byzylykë me guacka e deri te vajërat aromatik.
Art Life – Krijimi i pikturave me materiale të ricikluara.
Trend Twist – Produkti i kësaj skuadre është një çantë inteligjente e cila përfshin një karikues të lehtë me panele diellore. Karikuesi arrin të karikojë deri në 8 orë vetëm me ndihmën e energjisë diellore.
Naks-e – Produkti i Naks-e janë kufje, të cilat u krijuan me qëllimin për të falur qetësi dhe rritje të përqëndrimit. Kufjet u vijnë në ndihmë individëve, të cilët kanë probleme me pagjumsinë apo çregullime psikologjike.
Fauve – Fauve prodhon bojëra me materiale të padëmshe për mjedisin.
7weve – Sweven krijon bizhuteri të punuara me dorë
Ray of Self – Krijimi i komuniteteve virtuale dhe trajnimeve në tematika të ndryshme ku njerëzit mund të jenë vetvetja.
Posterum – Produkti është një karrocë inteligjente, e cila mban produktet e blera dhe ndjek të zotin duke mos u larguar më shumë se 3 metra nga ai, e pajisur me sensorë të cilët ndihmojnë në evitimin e pengesave.
Epilepsy Care – Një orë dore e cila ndihmon të sëmurët nëpërmjet një butoni specifik, në rast emergjence personi mjafton të shtypë butonin për të lajmëruar urgjencën.
Plantech – Produkti është një vazo inteligjente e cila ndihmon në ujitjen e luleve atëherë kur është e nevojshme.
Eunoia – Produktet janë çanta të qëndisura me dorë.
Diverso Art – Punime dore nga materiale të riciklueshme të cilat kthehen në art, copëza xhami, druri, fije etj.
LEXO: BERZH dhe donatorët mbështesin 5000 biznese të udhëhequra nga gratë në Ballkanin Perëndimor
Vertex – Një platformë, e cila ndihmon në gjetjen e zhvilluesve dhe skuadrave të zhvilluesve.
Ametsa – Produkti është një jastëk me një sistem të brendshëm masazhues.
Epoxy Art – Bizhuteri dhe dekorime të llojeve të ndryshme me bazë resinën.
Ecocreation – Produkti i kësaj skuadre konsiston në një mekanizëm, i cili i shtohet shishes së ujit dhe të kujton me anë të një alarmi në momentin që duhet të konsumosh ujë.
Office Green – Produkti i kësaj skuadre konsiston në një kosh inteligjent, i cili i ndan plehërat në 4 kategori dhe i riciklon.
Elizabeth’s Brand – Çanta të punuara me dorë dhe të qëndisura.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
